ΑΠΟ αζομάν σο αλλαξάλο ντα αβιλό Χριστιανός, ο Παύλος βακερέλας αντράλ πι γκίσταρ ο λατσσέ αμπέρια για τη Βασιλεία ι Ντεβλέσκι. Πριν τι αβέλ Χριστιανός, τζάλας κόντρα κο μαθητές κι Ιησούσκε, όμως ακανά ο γιαβερά τζενέ τζάνας λέσαρ κόντρα. Ο απόστολος Παύλος κερντάς μπουτ ταξίδια ντα γκιλό τθεμέντε σο ισινέ ντουρ για τι βακερέλ ο λατσσέ αμπέρια ι Βασιλειάκε. Οντιά Βασιλεία κα κερέλ οντουβά σο τθερέλας σκοπός ο Ντεβέλ από την αρχή ι τζενένγκε.

Κο Λύστρα, όταν ο Παύλος γκιλό ο πρώτος ταξίδι για τι κερέλ λάφι ι Ντεβλέσκε κο τζενέ, κερντάς λατσσές εκχέ τζενές σο ισινέ μπανγκό από αζομάν σο μπιάντιλοας. Ο τζενέ αρχισάλε τι ντεν βίκος ντα βακερένας ότι ο Παύλος ισινέ ντεβέλ. Ο ίδιος πράγμας βακερένας για τον Βαρνάβας-ντα σο ισινέ γιεκ ι Παυλόσαρ. Ο Παύλος ντα ο Βαρνάβας ζορίσαρ ατσσικιαρντέ ι τζενέν για μα τι κερέν λένγκε θυσίες. Όμως ο ίδια τζενέ, επειδή πιο σοράν ασουντέ ι Παυλόσκε ντουσμανίν, φουρτιντέ λέσκε μπαρά για τι μουνταρέν-λες ντα μουκχλέ-λες επειδή αμντισάλε ότι μουλόας. Ο Παύλος να μουλό ντα πιο σοράν ξαναγκιλό οντουλέ τθεμέστε για τι βακερέλ κο μαθητές σουκάρ λάφια σο κα ντένας-λεν δύναμη ντα θάρρος.

Μερικοί Ιουδαίοι Χριστιανοί βακερένας ότι οντουλά σο ισινέ πιστοί αλλά να ισινέ Ιουδαίοι έπρεπε τι κερέν κάποια πράγματα σο βακερέλας ο Νόμος του Μωυσή. Ο Παύλος βακερντάς ανταβά πρόβλημας κο απόστολοι ντα κο πρεσβύτεροι σο ισινέ κι Ιερουσαλήμ. Αφού ντικχλέ μπουτ λατσσές σο βακερένας ο Γραφές, ντα με τη βοήθεια του αγίου πνεύματος ι Ντεβλέσκο, ο απόστολοι ντα ο πρεσβύτεροι μπουτσσαντέ γράμματα κο εκκλησίες ντα βακερντέ τι ατσσόν ντουρ κατά είδωλα, κατά λουμνιπέ, ντα μα τι χαν ρατ ή μας σο τθερέλας αντρέ ρατ. Ανταλά εντολές ισινέ “σημαντικές”, αλλά για τι κερέλ-λεν εκ τζενό να χρειαζίντιβελας τι κερέλ οντουλά σο βακερέλας ο Μωσαϊκός Νόμος.​—Πράξεις 15:​28, 29.

Κο δεύτερος ταξίδι σο γκιλό ο Παύλος για τι κερέλ λάφι ι Ντεβλέσκε κο τζενέ, γκιλό κι Βέροια. Ο Ιουδαίοι σο μπεσένας οτθέ δεχτιντέ σαρέ πουμαρέ γκίσαρ ο λάφι ι Ντεβλέσκο, ντα διαβάνενας ο Γραφές κάθε ντιβές για τι ντικχέν άμα οντουλά σο βακερέλας λένγκε ο Παύλος ισινέ σωστά. Επειδή τζάνας λέσαρ κόντρα οντουλέ τθεμέστε-ντα, ο Παύλος νασλό οτθάρ ντα ανταγιά φαρ γκιλό κι Αθήνα. Οτθέ, κερντάς εκ λατσσί ομιλία ανγκλάλ μερικέ σπουδαγμέ τζενέντε. Κερντάς λάφι με σουκάρ τρόπος ντα χωρίς τι προσβαλίνελ-λεν.

Αφού κερντάς ο τρίτος ταξίδι για τι κερέλ λάφι ι Ντεβλέσκε κο τζενέ, ο Παύλος ερεσλό κι Ιερουσαλήμ. Όταν γκιλό κο ναός, μερικοί Ιουδαίοι μανγκλέ τι χαν-πες λέσαρ για τι μουνταρέν-λες. Ο Ρωμαίοι στρατιώτες τσσουντέ-πουμέν ανγκλάλ ντα κερντέ-λες ανάκριση. Επειδή τθερέλας δικαιώματα σαρ Ρωμαίος, ο Παύλος γκιλό πιο σοράν κο Ρωμαίος Κυβερνήτης Φήλικας για τι κερέλ λάφι ανγκλά-λέστε. Ο Ιουδαίοι να τθερένας αποδείξεις οντουλένγκε σο βακερένας για τι κατηγορίνεν ι Παυλός. Για μα τι ντελ-λες κο Ιουδαίοι, ο Παύλος βακερντάς κο Φήστος, σο ισινέ εκ γιαβέρ Ρωμαίος κυβερνήτης: «Ο Καίσαρας μανγκάβα τι ασουνέλ-μαν!» Ο Φήστος βακερντάς: «Κο Καίσαρας κα τζας».​—Πράξεις 25:​11, 12.

Σοράν, ι Παυλός γκερντέ-λες καραβίσαρ κι Ιταλία για τι νακχέλ από δικαστήριος. Επειδή ο καράβι βουλιαξάλο, ο Παύλος μπεσλό σαρό ο βεν κι Μάλτα. Όταν ερεσλό κι Ρώμη, μπεσλό ντούι μπρεσά εκχέ νοικιαμέ κχερέστε. Παρόλο σο εκ στρατιώτης αρακχαβέλας-λες, ο απόστολος Παύλος να τσσιναντάς τι κερέλ λάφι αντράλ πι γκίσταρ για τη Βασιλεία ι Ντεβλέσκι οντουλέ τζενέντε σο τζάνας τι ντικχέν-λες λέσκε κχερέστε.

​—Στηρίντιβελα κο εδάφια Πράξεις 11:​22–28:31.