HAN makombirte hi Pablo, madasigon hiya nga nagpasamwak han maopay nga sumat mahitungod han Ginhadian han Dios, tungod hito, ini nga parakontra hadto agsob makaeksperyensya hin duro nga pagkontra. Inin maduruto nga apostol nagbiyahe ha kahigrayoan basi magpasamwak mahitungod han Ginhadian nga magtutuman han orihinal nga katuyoan han Dios para ha katawohan.

Ha Listra, durante han siyahan nga pagbiyahe ni Pablo, may gintambal hiya nga piang tikang ha katawo. Tungod hito, an mga tawo nagsininggit nga dios hi Pablo ngan an iya kaupod nga hi Bernabe. Haros diri nira mapugngan an mga tawo ha pagdara hin mga halad ha ira. Kondi ha urhi, ini nga mga tawo naimpluwensyahan han mga kaaway ni Pablo, salit ira ginbato hiya tubtob han kahuna nira nga patay na hiya. Nakatalwas hiya hito, ngan ha urhi, binalik hiya hito nga syudad basi parig-unon ngan dasigon an mga disipulo.

Iginpirit han pipira nga Judio nga Kristiano nga an mga diri-Judio nga tumuroo sadang sumunod han pipira nga bahin han Mosaiko nga Balaud o Balaud nga iginhatag pinaagi kan Moises. Iginpasa ni Pablo ito nga problema ha mga apostol ngan katigurangan ha Jerusalem. Katapos usisahon hin maopay an Kasuratan ngan pinaagi han giya han baraan nga espiritu han Dios, ito nga mga kalalakin-an nagsurat ha mga kongregasyon, ngan nagsagdon nga likyan an idolatriya, pornikasyon, ngan pagkaon hin dugo ngan hin unod nga waray padugoa. Ito nga mga sugo “kinahanglan,” kondi basi masunod ito, diri obligado an usa nga tumanon an Mosaiko nga Balaud.​—Buhat 15:28, 29.

Ha ikaduha nga pagbiyahe ni Pablo, kinadto hiya ha Berea, nga Gresya na yana. Didto, may kaikag nga ginkarawat han mga Judio an mensahe ngan gin-usisa an Kasuratan adlaw-adlaw basi makompirma kon tinuod an iya igintututdo. Kondi makausa pa, nakaeksperyensya hiya hin pagkontra salit napiritan hiya pagkadto ha Atenas. Ha atubangan han edukado nga mga taga-Atenas didto, naghatag hiya hin mapwersa nga pahayag nga ehemplo hin pahayag nga matinalahuron, maaramon, ngan nakakadani.

Katapos han ikatulo nga pagbiyahe, kinadto hi Pablo ha Jerusalem. Han kinadto hiya ha templo didto, may mga Judio nga nagtikang hin samok ngan nag-iparatay ha iya. Nanhilabot an mga sundalo han Roma ngan gin-imbistigar hiya. Tungod kay tuminungnong han Roma, gindepensahan niya an iya kalugaringon ha urhi ha atubangan han Romano nga gobernador nga hi Felix. An mga Judio waray maipresenta nga ebidensya may kalabotan ha ira akusasyon kan Pablo. Basi pugngan hi Pesto, nga usa pa nga Romano nga gobernador, ha pagtubyan ha iya ha mga Judio, hi Pablo nagsiring: “Ako madangop kan Cesar.” Ngan hi Pesto binaton: “Kumadto ka kan Cesar.”​—Buhat 25:11, 12.

Katapos hito, iginsakay hi Pablo hin barko tikadto ha Italya basi bistahon. Kondi nalunod an barko, salit kinahanglan hiya magpabilin ha isla han Malta durante han katugnaw. Pag-abot ha Roma, nag-ukoy hiya ha plenitehan nga balay ha sulod hin duha ka tuig. Bisan kon may sundalo nga nagbabantay ha iya, madasigon nga nagpadayon hiya ha pagsangyaw mahitungod han Ginhadian han Dios ha ngatanan nga nabisita ha iya.

​—Iginbasar ha Buhat 11:22–28:31.