ঈশ্বর যেহোবাগী পান্দমশিং থুংহন্বদা অনৌবা খৃষ্টিয়ান শীংলুপ অদুনা য়াম্না মরুওইবা থৌদাং অমা লৌগনি। তৌইগুম্বশুং অহান্বা সেনচুরিগী মতমদা লৈরম্বা খৃষ্টিয়ানশিংদু সামস্যা থেংনরম্মী। সমস্যা খরদি মপান্দগী লাক্কনি। অদুবু অপান্ননা লাকপা নত্তবা খুদোংথিবা খরদি শীংলুপ মনুংদগী ওইগনি। হংবা য়াবা ৱাহংদি খৃষ্টিয়ানশিংনা মখোয়গী লমচৎকী নিয়ম-নিতি ঙাক্না চৎপা ঙমগদ্রা? খৃষ্টিয়ান গ্রীক্কী শাস্ত্রদা চিঠি ২১ য়াওই। চিঠি ২১ অসিদা কান্নবা য়াবা পাউতাকশিং, পুক্নিং থৌগৎনিংঙাই ওইবা ৱারোল কয়ামরুম য়াওই।

রোমীয়দগী হৌরগা হিব্রু ফাওবদা য়াওরিবা চিঠি তরামরি অসি পাখোনচৎপা পোলনা ইরম্বনি। চিঠিশিং অসি মখোয়না থুংলুগদৌরিবা মীশক নত্রগা শীংলুপশিং অদুগী মমীং লৌদুনা থোল্লি। ঐখোয় পোলনা ইরম্বা চিঠিশিং অদুগী হীরমশিংদুগী মরমদা খরা নৈনদুনা য়েংশি।

লমচৎ অমদি তৌথোরকপা শাজৎ-লীচৎকী মরমদা পীরম্বা পাউতাক। লমচৎ নাইদবগী থবক তৌবা অমদি লুদবা মখলগী পাপ তৌবা “মী মখৈনা ঈশ্বরগী নিংথৌ লৈবাক অদু ফংলোই।” (গালাতীয়া ৫:১৯-২১; ১ কোরিন্থীয়া ৬:৯-১১) তোঙান তোঙান্বা জাতিদগী লাকপা ঈশ্বরবু নিংজবা খুদিংমক্না অমত্তা ওইবগী ৱাখল চেনগদবনি। (রোমীয় ২:১১; এফিসা ৪:১-৬) ঐখোয়না মশাগী ওইজবা থাদোক্তুনা থাজবদা লৈমিন্নবা মপাংশিংবু অৱাৎ-অপা য়েংনদুনা মতেং পাংনগদবনি। (২ কোরিন্থীয়া ৯:৭) পোলনা হায়: “তত্তনা হায়জৌ।” ঈশ্বর নিংবশিংবু যেহোবাদা থম্মোইদগী প্রার্থনা তৌনবা পুক্নিং থৌগৎলম্মী। (১ থেসালোনিকীয়া ৫:১৭; ২ থেসালোনিকীয়া ৩:১; ফিলিপ্পীয়া ৪:৬, ৭) থাজবা য়াওনা প্রার্থনা তৌরবদি মদু ঈশ্বরনা তাবিগনি।—হিব্রু ১১:৬.

মতৌ করম্না য়ুম্বান পুন্সি হেন্না ফগৎহনগনি? মপুরোইবশিংনা মখোয়গী নুপীশিংবু মশামক্কী হকচাংনি খন্না নুংশিবীগদবনি। নুপী ওইবশিংনশু মৱা মপুরোইববু য়াম্না ঈকাই খুম্নজগদবনি। অঙাংশিংনা মখোয়গী মমা মপানা হায়বা ইঞ্জগদবনি। মসিনা ঈশ্বরবু হরাওহনগনি। মমা মপা ওইবশিংনা মচাশিংবু ঈশ্বরগী নিয়ম-নিতি শিজিন্নরগা নুংশিহৈবগা লোইননা লমজীংবিগদবনি।—এফিসা ৫:২২–৬:৪; কোলোসীয়া ৩:১৮-২১.

ঈশ্বরগী পান্দম ময়েক শেংহল্লি। মৌশিগী খুৎথাংদা পীরম্বা ৱায়েল পথাপশিং অদুগী শরুক অয়াম্বনা ইস্রায়েল মচাশিংবু খৃষ্টনা লাকত্রিঙৈ মতমদু ফাওবা ঙাকপি শেন্বীদুনা, লমজীংবিদুনা চৎলম্মী। (গালাতীয়া ৩:২৪) অদুম ওইনমক ঈশ্বরবু নিংজনবগীদমক খৃষ্টিয়ানশিংনা ৱায়েল পথাপশিং অদু ইন্বগী মথৌ তাদে। হিব্রুশিংদা ইরম্বা চিঠিদা পোলনা ৱায়েল পথাপশিং অদুগী অর্থ শন্দোক্না তাকখি। মহাক্না মতৌ করম্না খৃষ্টনা ঈশ্বরগী পান্দম মপুং ফাহনবগে হায়বদুশু উৎলম্মী। পোলনা হায়রম্মী মদুদি ৱায়েল পথাপশিং অদুগী মখাদা তোঙান তোঙান্না শিন্দোক্লম্বা থৌরমশিং অদু তুংদা ওইরক্কদৌবশিং অদুগী  মতাংদা য়াম্না মরু ওই। খুদম ওইনা শা উচেক কৎলম্বা অসিনা যীশুনা শিবিখিবা অদু মাংজৌননা মমি তাহল্লি। মদুগী শিবিখিবা অদুনা শোইদনা পাপ পুম্নমক কোকপিগনি। (হিব্রু ১০:১-৪) যীশুনা শিবিখিবগী মপান্দগী ঈশ্বরনা ৱায়েল পথাপকী ওইবা ৱারেপ্নবা অদু চৎনহনখিদ্রে। মরমদি মখোয়শিংদু মখা তানা দরকার লৈত্রে।—কোলোসীয়া ২:১৩-১৭; হিব্রু ৮:১৩.

শীংলুপ চুম্না লীংনবা লমজিং। শীংলুপ্তা দায়িত্ব পুনিংবা নুপাশিংনা লমচৎ য়াম্না ফজবা মীশক ওইগদবনি। মহাক শাস্ত্রগী মীৎয়েংদগীশু মতিক চাবা মীওই অমা ওইগদবনি। (১ তীমোথি ৩:১-১০, ১২, ১৩; তীতা ১:৫-৯) ঈশ্বর যেহোবাবু নিংজবশিংনা অমনা অমবু পুক্নিং থৌগৎননবা চাং নাইনা পুনগদবনি। (হিব্রু ১০:২৪, ২৫) লাইনিংবগা মরি লৈনবা মীতিং খুদিংমক থাজববু শাগৎপা অমদি তাকপি তম্বীনিংঙাই ওইগদবনি।—১ কোরিন্থীয়া ১৪:২৬, ৩১.

পোলনা তীমোথিদা চিঠি অনি ইরম্মী। মহাক্কী অনিশুবা চিঠি ইবা মতমদা পোল রোমদা হল্লক্তুনা লৈরম্মী। মহাক কৈশুমশঙদা মহাক্কী বিচারগী মতম ঙাইদুনা লৈরম্মী। থৌনা লৈবা মখোয় খরখক্তনা মহাকপু উনবা চৎলম্মী। মখোয়শিংদু মখোয়গী পুন্সিদা খুদোংথিবা লৈ হায়বদুশু খংলম্মী। পোলনা মহাক্কী মতম তেল্লে হায়বা খংলম্মী। মহাক্না হায়রম্মী: “ঐনা কন্না লান শোক্নখ্রে, ঐনা চেনগদবা লমজেন অদু চেনখ্রে, ঐনা থাজবা অদু ঙাক্লে।” (২ তীমোথি ৪:৭) মদুগী মতুং ইকুই কুইদনা পোল হাৎখি হায়দুনা থাজনৈ। তোইগুম্বশুং পাখোনচৎপা অসিনা ইরম্বা চিঠিশিং অদুনা অচুম্বা ঈশ্বরবু নিংজরিবশিংবু ঙসি ফাওবদা লমজিংলি।

​—রোমীয়; ১ কোরিন্থীয়া; ২ কোরিন্থীয়া; গালাতীয়া; এফিসা; ফিলিপ্পীয়া; কোলোসীয়া; ১ অমসুং ২ থেসালোনিকীয়া; ১ অমসুং ২ তীমোথি; তীতা; ফিলেমোন; হিব্রুদা য়ুম্ফম ওইবা।