L-24 TAQSIMA
Pawlu Jikteb lill-Kongregazzjonijiet
L-ittri taʼ Pawlu jsaħħu lill-Kristjani tal-ewwel seklu
IL-KONGREGAZZJONI Kristjana li kienet għadha kif twaqqfet kien se jkollha rwol importanti fit-twettiq tal-iskop taʼ Ġeħova. Imma l-Kristjani tal-ewwel seklu ma damux ma bdew jiġu attakkati. Kienu huma se jżommu l-integrità tagħhom lejn Alla meta jiffaċċjaw il-persekuzzjoni minn barra l-kongregazzjoni u l-perikli iktar sottili minn ġewwa l-kongregazzjoni? L-Iskrittura Griega Kristjana fiha 21 ittra li offrew il-pariri u l-inkuraġġiment meħtiġin.
Erbatax-il ittra minnhom—minn Rumani sa Ebrej—inkitbu mill-appostlu Pawlu. Dawn l-ittri huma msemmijin għal dawk li rċivewhom—sew jekk kienu individwi u sew jekk membri taʼ kongregazzjoni partikulari. Ikkunsidra xi ftit mis-suġġetti li tkellem dwarhom Pawlu fl-ittri tiegħu.
Twissijiet dwar il-morali u l-kondotta. Min jipprattika ż-żína, l-adulterju, u dnubiet serji oħrajn “ma jiritx is-saltna t’Alla.” (Galatin 5:19-21; 1 Korintin 6:9-11) Dawk li jqimu lil Alla, ikunu taʼ liema nazzjonalità jkunu, iridu jkunu magħqudin. (Rumani 2:11; Efesin 4:1-6) Għandhom jagħmlu kulma jistgħu biex bil-ferħ jgħinu lil sħabhom tal-istess twemmin fil-bżonn. (2 Korintin 9:7) “Itolbu bla waqfien,” qal Pawlu. Tabilħaqq, dawk li jqimu lil Ġeħova huma mħeġġin jiftħu qalbhom miegħu fit-talb. (1 Tessalonikin 5:17; 2 Tessalonikin 3:1; Filippin 4:6, 7) Biex it-talb jinstemaʼ minn Alla, irid jingħad bil-fidi.—Ebrej 11:6.
X’se jgħin lill-familji jirnexxu? L-irġiel għandhom iħobbu lin-nisa tagħhom bħal ġisimhom stess. In-nisa għandhom ikollhom rispett profond lejn żwieġhom. It-tfal għandhom jobdu lill-ġenituri tagħhom, għax dan jogħġob lil Alla. Il-ġenituri jridu jiggwidaw u jħarrġu lil uliedhom bl-imħabba, billi jużaw il-prinċipji li jinsabu fil-kelma t’Alla.—Efesin 5:22–6:4; Kolossin 3:18-21.
Għajnuna biex jinftiehem l-iskop t’Alla. Ħafna aspetti tal-Liġi Mosajka servew biex jipproteġu u jmexxu lill-Israelin sakemm jasal Kristu. (Galatin 3:24) Madankollu, il-Kristjani m’għandhomx għalfejn josservaw din il-Liġi biex iqimu lil Alla. Meta kiteb lill-Ebrej—Kristjani li qabel kienu Lhud—Pawlu tefaʼ ħafna dawl fuq it-tifsir tal-Liġi u fuq kif l-iskop t’Alla jitwettaq bi Kristu. Pawlu spjega li diversi partijiet taʼ dik il-Liġi kellhom valur profetiku. Pereżempju, l-issagrifikar tal-annimali ta stampa bil-quddiem tal-mewt taʼ Ġesù bħala sagrifiċċju, li kienet se ġġib maħfra vera mid-dnubiet. (Ebrej 10:1-4) Permezz tal-mewt taʼ Ġesù, Alla ħassar il-patt tal-Liġi għax ma kienx għad hemm bżonnu.—Kolossin 2:13-17; Ebrej 8:13.
Direzzjoni dwar kif il-kongregazzjoni tkun organizzata b’mod xieraq. Irġiel li jkunu lesti li jġorru r-responsabbiltajiet fil-kongregazzjoni jrid ikollhom livelli morali għoljin u jkollhom il-kwalifiki li huma mniżżlin fil-Bibbja. (1 Timotju 3:1-10, 12, 13; Titu 1:5-9) Dawk li jqimu lil Alla Ġeħova għandhom jinġabru flimkien regolarment maʼ sħabhom tal-istess twemmin sabiex jinkuraġġixxu lil xulxin. (Ebrej 10:24, 25) Il-laqgħat għall-qima għandhom ikunu inkuraġġanti u istruttivi.—1 Korintin 14:26, 31.
Sakemm Pawlu ġie biex jikteb it-tieni ittra miż-żewġ ittri tiegħu lil Timotju, l-appostlu kien lura Ruma; hu ġie mitfugħ il-ħabs u kien qed jistenna s-sentenza. Ftit biss kienu dawk l-uħud kuraġġużi li ssograw imorru jarawh. Pawlu kien jaf li kien baqagħlu ftit żmien. Hu qal: “Jien iġġilidt il-ġlieda t-tajba, ġrejt il-korsa sat-tmiem, osservajt il-fidi.” (2 Timotju 4:7) X’aktarx li ftit wara Pawlu miet martri. Imma sal-lum l-ittri tal-appostlu għadhom jiggwidaw lil dawk li jqimu lill-Alla l-veru.
—Ibbażat fuq Rumani; 1 Korintin; 2 Korintin; Galatin; Efesin; Filippin; Kolossin; 1 Tessalonikin; 2 Tessalonikin; 1 Timotju; 2 Timotju; Titu; Filemon; Ebrej.