ଯିହୋବାଙ୍କ ଇଚ୍ଛାକୁ ପୂର୍ଣ୍ଣକରିବା ପାଇଁ ପ୍ରଥମ ଶତାବ୍ଦୀର ନୂତନ ଗଠିତ ଖ୍ରୀଷ୍ଟିୟ ମଣ୍ଡଳୀ, ଏକ ମୁଖ୍ୟ ଭୂମିକା ଗ୍ରହଣ କରିବାରଥିଲା । କିନ୍ତୁ ପ୍ରଥମ ଶତାବ୍ଦୀର ଖ୍ରୀଷ୍ଟିୟାନମାନେ ଆକ୍ରମଣର ସମ୍ମୁଖୀନ ହେଲେ । ମଣ୍ଡଳୀର ବାହାରୁ ତାଡ଼ନା ଓ ମଣ୍ଡଳୀ ମଧ୍ୟରେ କିଛି ଗୁପ୍ତ ସମସ୍ୟାକୁ ସାମନା କଲେ, ସେମାନେ କʼଣ ଈଶ୍ୱରଙ୍କର ବିଶ୍ୱସ୍ତତା ରଖିପାରିବେ ? ଖ୍ରୀଷ୍ଟିୟ ଗ୍ରୀକ୍‌ ଶାସ୍ତ୍ରରେ ୨୧ଟି ଚିଠି ଅଛି ଯାହା ଆବଶ୍ୟକୀୟ ଉପଦେଶ ଓ ଉତ୍ସାହ ଦିଏ ।

ରୋମୀୟ ରୁ ଏବ୍ରୀ ପୁସ୍ତକ ପର୍ଯ୍ୟନ୍ତ ୧୪ଟି ଚିଠି ପ୍ରେରିତପାଉଲଙ୍କ ଦ୍ୱାରା ଲିଖିତ । ଏହି ଚିଠିଗୁଡ଼ିକ ଲେଖାଯାଇଥିବା ନିର୍ଦ୍ଧିଷ୍ଟ ମଣ୍ଡଳୀର ସଦସ୍ୟ ବା ବ୍ୟକ୍ତି ବିଶେଷଙ୍କ ଉପରେ ଆଧାରିତ କରି ନାମିକରଣ କରାଯାଇଛି । ଆସନ୍ତୁ ପାଉଲଙ୍କ ଚିଠିଗୁଡ଼ିକର କେତେକ ବିଷୟଗୁଡ଼ିକୁ ଆଲୋଚନା କରି ଦେଖିବା ।

ନୈତିକତା ଓ ଆଚରଣ ସମ୍ପର୍କରେ ଉପଦେଶ । ବ୍ୟଭିଚାରୀ, ବିବାହ ବାହାରେ ଯୌନ ସମ୍ପର୍କ ରଖିଥିବା ବ୍ୟକ୍ତି ଓ ଅନ୍ୟାନ୍ୟ ଗୁରୁତର ପାପ କାର୍ଯ୍ୟରେ ଲିପ୍ତଥିବା ଲୋକ, “ଈଶ୍ୱରଙ୍କ ରାଜ୍ୟର ଅଧିକାରୀ ହେବେ ନାହିଁ ।” (ଗାଲାତୀୟ ୫:୧୯-୨୧; ୧ କରିନ୍ଥୀୟ ୬:୯-୧୧) ଈଶ୍ୱରଙ୍କ ଉପାସକମାନେ ଜାତି ନିର୍ବିଶେଷରେ ଏକତ୍ରିତ ହେବାକୁ ପଡ଼ିବ । (ରୋମୀୟ ୨:୧୧; ଏଫିସୀୟ ୪:୧-୬) ସେମାନେ ଆବଶ୍ୟକ ସ୍ଥଳେ ପରସ୍ପର ମଧ୍ୟରେ ସହବିଶ୍ୱାସୀଙ୍କୁ ଖୁସୀ ଖୁସୀ ସାହାଯ୍ୟ କରିବାକୁ ହେବ । (୨ କରିନ୍ଥୀୟ ୯:୭) ପାଉଲ କହନ୍ତି: “ନିରନ୍ତର ପ୍ରାର୍ଥନା କର” । ଉପାସକଙ୍କୁ ପ୍ରୋତ୍ସାହିତ କରାଯାଏ ଯେ ସେମାନେ ଯିହୋବାଙ୍କୁ ସହୃଦୟରେ ପ୍ରାର୍ଥନା କରନ୍ତୁ । (୧ ଥେସଲନିକୀୟ ୫:୧୭; ୨ ଥେସଲନିକୀୟ ୩:୧; ଫିଲିପ୍ପୀୟ ୪:୬, ୭) କେବଳ ବିଶ୍ୱାସରେ କରିଥିବା ପ୍ରାର୍ଥନାକୁ ହିଁ ଈଶ୍ୱର ଶୁଣିଥାନ୍ତି ।—ଏବ୍ରୀ ୧୧:୬.

ପରିବାରଗୁଡ଼ିକକୁ ଉନ୍ନତି କରିବା ପାଇଁ କʼଣ ସାହାଯ୍ୟ କରିପାରେ ? ସ୍ୱାମୀମାନେ ନିଜ ପତ୍ନୀମାନଙ୍କୁ ନିଜ ଶରୀର ଭଳି ପ୍ରେମ କରିବା ଉଚିତ୍‌ । ପତ୍ନୀମାନେ ନିଜ ସ୍ୱାମୀମାନଙ୍କୁ ଆଦର କରିବା ଉଚତ୍‌ । ପିଲାମାନେ ନିଜ ନିଜ ପିତାମାତାଙ୍କ ଆଜ୍ଞାକାରୀ ହେବା ଦରକାର, କାରଣ ଏଥିରେ ଈଶ୍ୱର ଖୁସୀ ହୁଅନ୍ତି । ପିତାମାତା ନିଜ ନିଜ ପିଲାମାନଙ୍କୁ ଈଶ୍ୱରଙ୍କ ନୀତିଅନୁସାରେ ପ୍ରେମପୂର୍ବକ ଶିକ୍ଷା ଦେବା ଉଚିତ୍‌ ।—ଏଫିସୀୟ ୫:୨୨-୬:୪; କଲସୀୟ ୩:୧୮-୨୧.

ଈଶ୍ୱରଙ୍କ ଉଦ୍ଦେଶ୍ୟ ସ୍ପଷ୍ଟ ହେଲା । ଖ୍ରୀଷ୍ଟଙ୍କ ଆଗମନ ନ ହେବା ପର୍ଯ୍ୟନ୍ତ ମୋଶାଙ୍କ କେତେକ ନିୟମ ଇସ୍ରାଏଲୀୟମାନଙ୍କୁ ରକ୍ଷା କରିବା ସହିତ ରାସ୍ତା ଦେଖାଇଥିଲା । (ଗାଲାତୀୟ ୩:୨୪) ତଥାପି ଖ୍ରୀଷ୍ଟିୟାନମାନଙ୍କୁ ଈଶ୍ୱରଙ୍କ ଉପାସନା ପାଇଁ ମୋଶାଙ୍କ ନିୟମ ପାଳନ କରିବା ଆବଶ୍ୟକ ନାହିଁ । ଏବ୍ରୀୟ ଖ୍ରୀଷ୍ଟିୟାନମାନଙ୍କୁ ପାଉଲ ଚିଠି ଲେଖି ନିୟମର ଅର୍ଥ କହିବା ସହିତ ଈଶ୍ୱରଙ୍କ ଉଦ୍ଦେଶ୍ୟ କିପରି ଖ୍ରୀଷ୍ଟଙ୍କଠାରେ ପୂରଣ ହେଲା ସେହି ବିଷୟରେ ମଧ୍ୟ ବୁଝେଇଥିଲେ । ପାଉଲ  ବୁଝେଇଥିଲେ ଯେ ନିୟମର ବ୍ୟବସ୍ଥା ମଧ୍ୟରେ ଅନେକ ଭବିଷ୍ୟତବାଣୀ ମୂଳକ ମୂଲ୍ୟ ରହିଛି । ଉଦାହରଣ ପାଇଁ, ପଶୁବଳି ଥିଲା ଯୀଶୁଙ୍କ ବଳିଦାନ ମୂଳକ ମୃତ୍ୟୁର ଏକ ଛାୟା ସ୍ୱରୂପ ଯାହା ପ୍ରକୃତ ପାପକ୍ଷମା କରିପାରେ । (ଏବ୍ରୀ ୧୦:୧-୪) ଯୀଶୁଙ୍କ ମୃତ୍ୟୁ ପରେ ଈଶ୍ୱର ସେହି ନିୟମ ଚୁକ୍ତିକୁ ରଦ୍‌ କରିଲେ, କାରଣ ଏହାର କୌଣସି ଆବଶ୍ୟକତା ରହିଲା ନାହିଁ ।—କଲସୀୟ ୨:୧୩-୧୭; ଏବ୍ରୀ ୮:୧୩.

ମଣ୍ଡଳୀର ଉପଯୁକ୍ତ ସାଂଗଠନିକ ବ୍ୟବସ୍ଥା ସମ୍ପର୍କରେ ନିର୍ଦ୍ଦେଶନା । ଯେଉଁ ପୁରୁଷମାନେ ମଣ୍ଡଳୀର ଦାୟିତ୍ୱ ନେବାକୁ ଚାହାନ୍ତି ସେମାନଙ୍କୁ ଉଚ୍ଚ ନୈତିକତା ଓ ଆଧ୍ୟାତ୍ମିକ ଯୋଗ୍ୟ ହେବା ଦରକାର । (୧ ତୀମଥି ୩:୧-୧୦, ୧୨, ୧୩; ତୀତସ ୧:୫-୯) ଯିହୋବା ଈଶ୍ୱରଙ୍କ ଉପାସକମାନେ ସବୁବେଳେ ପରସ୍ପରକୁ ପ୍ରୋତ୍ସାହନ କରିବାପାଇଁ ନିୟମିତ ଏକତ୍ରିତ ହେବା ନିହାତି ଦରକାର । (ଏବ୍ରୀ ୧୦:୨୪, ୨୫) ଉପାସନାର ସଭାଗୁଡ଼ିକ ପ୍ରକୃତରେ ଶିକ୍ଷାଉପଯୋଗୀ ଓ ଗଠନ ମୂଳକ ହେବା ଉଚିତ୍‌ ।—୧ କରିନ୍ଥୀୟ ୧୪:୨୬, ୩୧.

ପାଉଲ ତୀମଥିଙ୍କୁ ଦ୍ୱିତୀୟ ଚିଠି ଲେଖିଲା ବେଳେ ରୋମକୁ ଫେରି ଯାଇଥିଲେ; ସେ କାରାଗାରରେ ଥାଇ ବିଚାରର ଅପେକ୍ଷାରେ ଥିଲେ । ମାତ୍ର କେତେଜଣ ସାହସୀ ଲୋକ ନିଜକୁ ବିପଦରେ ସମ୍ମୁଖୀନ କରି ତାʼଙ୍କୁ ଦେଖାକରିବାକୁ ଆସୁଥିଲେ । ପାଉଲ ଜାଣିପାରୁଥିଲେ ଯେ ତାହାଙ୍କ ଜୀବନର ଶେଷ ସମୟ ଆସିଯାଇଛି । “ମୁଁ ଉତ୍ତମ ଯୁଦ୍ଧରେ ପ୍ରାଣପଣ କରିଅଛି,” ସେ କହିଥିଲେ । “ନିରୂପିତ ପଥର ଶେଷ ପର୍ଯ୍ୟନ୍ତ ଦୌଡ଼ିଅଛି, ମୁଁ ବିଶ୍ୱାସ ରକ୍ଷା କରିଅଛି ।” (୨ ତୀମଥି ୪:୭) ପ୍ରାୟତଃ, ଏହାପରେ ପାଉଲଙ୍କ ହତ୍ୟା କରାଗଲା । କିନ୍ତୁ ଏହି ପ୍ରେରିତଙ୍କର ଚିଠିଗୁଡ଼ିକ ଆଜି ମଧ୍ୟ ସତ୍ୟ ଉପାସକଙ୍କୁ ପଥ ପ୍ରଦର୍ଶନ କରାଉଛି ।

—ଏହା ରୋମୀୟ; ୧ କରିନ୍ଥୀୟ; ୨ କରିନ୍ଥୀୟ; ଗାଲାତୀୟ; ଏଫିସୀୟ; ଫିଲିପ୍ପୀୟ; କଲସୀୟ; ୧ ଥେସଲନିକୀୟ; ୨ ଥେସଲନିକୀୟ; ୧ ତୀମଥି; ୨ ତୀମଥି; ତୀତସ; ଫିଲୀମୋନ; ଏବଂ ଏବ୍ରୀ ପୁସ୍ତକ ଉପରେ ଆଧାରିତ ।