ФИЦЦАГ киристон ӕмбурдтӕ кӕдӕй фӕззиндтӕнцӕ, уӕдӕй Йеговӕ ӕ фӕндон уони фӕрци ӕнхӕст кӕнуй. Фал фиццаг ӕноси киристӕнтти хъӕбӕр ӕфхуардтонцӕ. Цума уӕхӕн зиндзийнӕдтӕ ӕййафгӕй, ӕмбурди медӕг дӕр ӕма ӕнӕуой дӕр, еузӕрдонӕй байзадӕнцӕ? Киристон Грекъаг Финстити ӕдеугурӕй ес 21 финстӕги. Еци финстӕгутӕ ӕууӕндундзийнадӕ федар кӕнунцӕ ӕма си ес хуарз унаффитӕ.

14 финстӕги, Ромӕгтӕмӕ финстӕгӕй – Дзиуиттӕгтӕмӕ, ниффинста апостол Павел. Финстӕгути сӕргӕндтӕ хӕссунцӕ, ци адӕймагмӕ кенӕ ци ӕмбурдмӕ финст адтӕнцӕ, уони нӕмттӕ. Ӕркӕсӕн, еци финстӕгути дзурд цӕбӕл цудӕй, уомӕ.

Уагӕ ӕма ӕгъдау. Хӕтгӕ ка кӕнуй кенӕ ӕндӕр уӕззау тӕрегъӕдтӕ ка кӕнуй, етӕ «Хуцауи паддзахадӕ бунӕн нӕ райсдзӕнцӕ» (Галатӕгтӕмӕ 5:19–21; 1 Коринфӕгтӕмӕ 6:9–11). Хуцауи адӕми астӕу гъӕуама еудзийнадӕ уа, цийфӕнди адӕмихаттӕй ма уонцӕ, уӕддӕр (Ромӕгтӕмӕ 2:11; Ефесӕгтӕмӕ 4:1–6). Ӕнхус гъӕуагӕ ка ӕй, уонӕмӕ гъӕуама фӕккӕсунмӕ цӕттӕ уонцӕ (2 Коринфӕгтӕмӕ 9:7). Павел загъта: «Алкӕддӕр коветӕ». Апостол киристӕнтти разӕнгард кӕнуй, цӕмӕй сӕ гъудитӕ ӕма сӕ зӕрди ’нкъарӕнтӕ Йеговӕн дзоронцӕ (1 Фессалоникӕгтӕмӕ 5:17; 2 Фессалоникӕгтӕмӕ 3:1; Филиппӕгтӕмӕ 4:6, 7). Ӕма сӕ цӕмӕй Хуцау игъоса, уой туххӕй ибӕл гъӕуама федарӕй ӕууӕндонцӕ (Дзиуиттӕгтӕмӕ 11:6).

Бийнонтӕ кӕрӕдзебӕл ӕнгом цӕй фӕрци уодзӕнцӕ? Лӕг гъӕуама ӕ уоси уарза, ӕхе куд уарзуй, уотӕ, уосӕ ба гъӕуама ӕ лӕги нимайа. Сувӕллӕнттӕ ба гъӕуама сӕ ниййергутӕмӕ игъосонцӕ, уомӕн ӕма е Хуцауи цӕсти раст ӕй. Сувӕллӕнтти гъомбӕл кӕнгӕй ниййергутӕ гъӕуама, Хуцауи Дзурди ци унаффитӕ ес, уонӕй пайда кӕнонцӕ (Ефесӕгтӕмӕ 5:22–6:4; Колоссӕгтӕмӕ 3:18–21).

Хуцау ӕргом кӕнуй ӕ фӕндтӕ. Моисеййи закъон израилӕгти гъӕуай кодта ӕма син Киристей ӕрцудмӕ разамунд лӕвардта (Галатӕгтӕмӕ 3:24). Фал киристӕнтти еци Закъонмӕ гӕсгӕ цӕрун нӕбал гъудӕй. Павел дзиуиттӕгтӕмӕ ци финстӕг ниффинста, уоми хуарз балӕдӕрун кодта, Моисеййи закъон лӕвӕрд цӕмӕн ӕрцудӕй ӕма Хуцауи фӕндон Киристей фӕрци куд исӕнхӕст уодзӕй, уой. Павел финста, Закъони кӕцидӕр фӕззелӕнтӕ Киристемӕ ке амонунцӕ. Зӕгъӕн, фонс нивонди ке хастонцӕ, е амудта, Киристе ӕ цард нивондӕн ке ӕрхӕсдзӕй ӕма адӕми тӕрегъӕдтӕ хатиргонд ке ’рцӕудзӕнцӕ, уомӕ (Дзиуиттӕгтӕмӕ 10:1–4). Йесой нивонди фӕсте Хуцау  Моисеййи закъон нӕбал ӕнхӕст кӕнун кодта, уомӕн ӕма еци Закъон ӕ нисан исӕнхӕст кодта (Колоссӕгтӕмӕ 2:13–17; Дзиуиттӕгтӕмӕ 8:13).

Киристон ӕмбурд. Ӕмбурди ихӕстӕ ӕнхӕст кӕнун ке фӕндуй, еци ӕнсувӕртӕ гъӕуама уонцӕ хуӕрзӕгъдау ӕма Библий унаффитӕмӕ гӕсгӕ цӕронцӕ (1 Тимофеймӕ 3:1–10, 12, 13; Титмӕ 1:5–9). Йегови лӕггадгӕнгутӕ гъӕуама еумӕ ӕмбурд кӕнонцӕ, цӕмӕй кӕрӕдзей нифс федар кӕнонцӕ (Дзиуиттӕгтӕмӕ 10:24, 25). Еци ӕмбурдти гъӕуама Библий уагӕвӕрдтӕмӕ гӕсгӕ цӕрун ахур кӕнонцӕ (1 Коринфӕгтӕмӕ 14:26, 31).

Павел Тимофеймӕ дуккаг финстӕг ниффинста, Роми ахӕст ку адтӕй ӕма тӕрхонмӕ ку ’нгъӕлмӕ кастӕй, уӕд. Е ’мбӕлттӕй имӕ ӕрмӕстдӕр еуӕй-еуетӕ сӕ нифс бахастонцӕ ӕрбацӕун. Павел ӕй лӕдӕрдтӕй, берӕ рӕстӕг ин ке нӕбал ес, ӕма уомӕ гӕсгӕ ниффинста: «Ӕз федарӕй тох кодтон, мӕ надбӕл кӕронмӕ ралигъдтӕн, ме ’ууӕндундзийнадӕ багъӕуай кодтон» (2 Тимофеймӕ 4:7). Ӕвӕдзи, уомӕй минкъий фӕстӕдӕр Павелӕн мӕлӕти тӕрхон рахастонцӕ. Фал ӕ финстӕгути ци унаффитӕ ес, етӕ абони дӕр ӕцӕг киристӕнттӕн пайда хӕссунцӕ.

1 ӕма 2 Коринфӕгтӕмӕ; Галатӕгтӕмӕ; Ефесӕгтӕмӕ; Филиппӕгтӕмӕ; Колоссӕгтӕмӕ; 1 ӕма 2 Фессалоникӕгтӕмӕ; 1 ӕма 2 Тимофеймӕ; Титмӕ; Филимонмӕ; Дзиуиттӕгтӕмӕ.