JESUSPA ñawpaq qatikuqninkunawanmi Diospa munaynin hunt’akunan karqan. Ichaqa qatiykachasqan karqanku, paykuna ukhupipas sasachakuykunan karqan. ¿Iman paykunata yanaparqan Diospaq hunt’aq sonqo kanankupaq? Griego Qelqakunapi tarikuq iskay chunka hukniyoq cartakunan kallpacharqan, chaypin tarirqanku sumaq yuyaychaykunatapas.

Romanos cartamanta Hebreos cartakaman apóstol Pablo qelqarqan, llapanpiqa chunka tawayoq cartakunan. Chay cartakunaqa pimanchus apachisqa karqan chay sutiwanmi kashan. Qatimuqpin yachasun imamantan chay cartakuna rimashan chayta.

Imayna kawsanamanta. Qhelli huchapi puriqkuna, wasanchaqkuna otaq ima hatun huchapi kawsasqankumanta mana pesapakuqkunaqa “manan Diospa qhapaqsuyunman haykunqakuchu” (Gálatas 5:19-21; 1 Corintios 6:9-11). Huk llaqtayoqña kanku chaypas Diospa llaqtanqa huk-nisqallan kawsananku (Romanos 2:11; Efesios 4:1-6). Iñiqpuran sumaqta yanapanakunanku, qoykukuq sonqotaqmi kananku (2 Corintios 9:7). Pablon iñiqkunata kallpacharqan sonqonkuta Diosman kicharinankupaq, nirqantaqmi: “Mañakushallaychispuni”, nispa (1 Tesalonicenses 5:17; 2 Tesalonicenses 3:1; Filipenses 4:6, 7). Dios uyarinanpaqmi ichaqa iñiywan mañakunanku (Hebreos 11:6).

¿Imanirqanmi apóstol Pablo familiakunata? Qosakunan esposankuta munakunanku kikinkuta hina. Esposakunapas respetowanmi qosankuta qhawarinanku. Wawakunapas tayta-mamankutan kasukunanku, tayta-mamakunataq Diospa nisqanman hina wawankuta munakuywan uywananku (Efesios 5:22–6:4; Colosenses 3:18-21).

Diospa munayninmanta. Moisespa chaskisqan kamachikuymi Israel runakunata yanaparqan pakaykurqan ima Mesías chayamunankama. Cristianokunan ichaqa manaña chay kamachikuyman hinachu kawsananku karqan (Gálatas 3:24). Hebreo cristianokunaman carta apachisqanpin Pablo sut’incharqan Kamachikuy Simipas Jesuspa ruwasqanpas Diospa munaynin hunt’akunanpaq kasqanta. Willarqanmi Moisesman Diospa qosqan wakin Kamachikuykuna hamuq tiempo allin kaqkunaq llanthun hinalla kasqanta. Animalkunata sacrificasqankun  rikch’akurqan qhepaman huchanchiskunarayku Jesucristoq sacrificakusqanwan (Hebreos 10:1-4). Arí, Jesuspa wañuyninwanmi Kamachikuy Simi yanqayapurqan (Colosenses 2:13-17; Hebreos 8:13).

Diospa llaqtanpi ruwaykunamanta. Diospa llaqtanpi umalliq qharikunaqa mana huchachanatan kawsananku hunt’anankutaqmi umallikunapaq Bibliapi kamachikuykunata (1 Timoteo 3:1-10, 12, 13; Tito 1:5-9). Hinaspapas Diosta serviqkunaqa sapa kutillanmi huñunakunanku Bibliamanta yachanankupaq kallpachanakunankupaq ima (1 Corintios 14:26, 31; Hebreos 10: 24, 25).

Timoteoman iskaykaq cartata qelqashaspan Pablo Roma llaqtapi preso tarikurqan juzganankuta suyaspa. Paytaqa iskay kinsa cristianokunallan mana manchakuspa watukurqanku. Wañuchinankuta yachaspan nirqan: “Allin maqanakuytan maqanakuniña, llank’anaytan tukuniña, iñiyniypin qaqata sayarqani”, nispa (2 Timoteo 4:7). Yaqapaschá chay qhepallaman wañuchirqanku. Ichaqa cartakuna qelqasqanmi cristianokunata yanaparqan tukuy sonqowan Diosta servinankupaq, kunanpas yanapashanmi cheqaq cristianokunata.

(Romanos; 1 Corintios; 2 Corintios; Gálatas; Efesios; Filipenses; Colosenses; 1 Tesalonicenses; 2 Tesalonicenses; 1 Timoteo; 2 Timoteo; Tito; Filemón; Hebreos.)