CONGREGACIÓN nema aku xlakatsukunit xmakgtayaninalh xlakata tlan xmakgantaxtilh wantuku lakapastaknit natlawa Jehová. Pero tiku xalak kcongregación tayanikgolh taputsastalanit chu na titaxtukgolh lu xatuwa taʼakglhuwit nema xʼanan kcongregación. ¿La tlawakgolh xlakata ni xmakgatsankgananikgolh Dios? Puxamatum cartas nema wilakgolh kTatsokgni xaGriego kamatliwakglhli chu kamaxkilh lu xalaktlan tastakyaw nema lu xmaklakaskinkgo.

Pablo katsokgli xapulana akgkutati cartas nema litsuku Romanos chu lisputa Hebreos. Putum cartas xkgalhi xtukuwani tiku kamalakgachanilh, akxni malakgachanilh chatum latamanan o akxni kamalakgachanilh congregación. Kaʼakxilhwi makgapitsi tuku lichuwinalh Pablo.

Tastakyaw xlakata tuku xlitlawatkan chu tuku ni xlitlawakan. Tiku tlawakgo talakgxtumit nema ni xlitatlawat, tiku akgskgawi xchixku o xpuskat chu atanu laklanka talakgalhin chu ni limasi pi nitlan limakgkatsi tuku tlawalh «ni katilakgchankgolh kxtapaksin Dios» (Gálatas 5:19-21; 1 Corintios 6:9-11). Xlakskujnin Jehová ni mastakgo talakaskin nalalakgmakgan kaj xlakata tanu tanu xkachikinkan (Romanos 2:11; Efesios 4:1-6). Xlimastatkan tuku kgalhikgo chu nakamakgtayakgo xnatalankan (2 Corintios 9:7). Apóstol Pablo kawanilh pi kamalakinikgolh xnakujkan Jehová chu kawanilh: «Ni anan xtajaxni nkatlawatit mioraciónkan» (1 Tesalonicenses 5:17; 2 Tesalonicenses 3:1; Filipenses 4:6, 7). Pero xlakata Dios xkgaxmatli xʼoracionkan xlakaskinka xlimasikgolh xtakanajlakan (Hebreos 11:6).

¿Tukuya tastakyaw kamaxkilh Pablo familias? Lakchixkuwin xlipaxkitkan xpuskatkan chuna la kapaxkikan. Chu lakpuskatin xliputum xnakujkan namaxkikgo kakni xchixkukan. Nachuna, Dios lakaskin pi kamanan kakgalhakgaxmatkgolh xnatlatnikan, chu natlatni kalimasiyanikgolh tapaxkit akxni nakastakyawakgo chuna la wan xtachuwin Dios (Efesios 5:22–6:4; Colosenses 3:18-21).

Tuku lakapastaknit natlawa Dios. Limapakgsin nema maxkika Moisés kamakgtayalh chu kapulalilh israelitas asta akxni chilh Mesías tiku xwankanit pi namin, pero kstalaninanin Cristo nialh xlakaskinka xkgalhakgaxmatkgolh (Gálatas 3:24). Carta nema kamalakgachanilh Hebreos kstalaninanin Cristo tiku judíos xwankgonit, Pablo kawanilh tuku xlakata xkamaxkikanit Limapakgsin chu la Cristo xʼama makgantaxti tuku lakapastaknit natlawa Dios. Wa pi lhuwa Limapakgsin wi  tuku xkilhchanima. Akgtum liʼakxilhtit, akxni xmakamastakan animales xkilhchanima xtamakamastan Jesús, kaj makgtum xʼama masta xlatamat xlakata xkinkatapatikan kintalakgalhinkan (Hebreos 10:1-4). Wa xlakata, akxni nilh Cristo masputulh Limapakgsin (Colosenses 2:13-17; Hebreos 8:13).

La talakaxwilinit congregación. Lakchixkuwin tiku kalakgayawakan taskujut congregación xaʼakgstitum xlilinatkan xlatamatkan chu xlimakgatsitkan tuku wan Biblia (1 Timoteo 3:1-10, 12, 13; Tito 1:5-9). Nachuna, lu xlakaskinka pi putum xlakskujnin Dios xaʼankgalhin natamakxtumikgo xlakata namakglhtinankgo lu xatlan tastakyaw chu nalamatliwakglha (1 Corintios 14:26, 31; Hebreos 10:24, 25).

Akxni Pablo xlimakgtiy malakgachanilh carta Timoteo tachin xwilakcha kRoma chu atsinu xtsankga namakgnikan. Kajwatiya makgapitsi kstalaninanin Cristo tiku ni xpekuankgo lakgapaxialhnankgolh. Xlakata Pablo xkatsi pi atsinu xtsankga namakgnikan, tsokgnalh: «Fuerzaj ktlawaninit [...] kputalatlaw, ya kmasputunit nkintaskujut, na ni kmakgaxtakgnit nkintakanajla» (2 Timoteo 4:7). Makgnika akxni ni lhuwa kilhtamaku xtitaxtunit akxni tsokgli carta. Pero, cartas nema katsokgli chuntiya kamakgtayalh xaxlikana kstalaninanin Cristo xlakata ni xmakgatsankgananikgolh Dios chu la uku chuntiya makgtayanama.

(Takilhtinit kRomanos, 1 xla Corintios, 2 xla Corintios, kGálatas, kEfesios, kFilipenses, kColosenses, 1 xla Tesalonicenses, 2 xla Tesalonicenses, 1 xla Timoteo, 2 xla Timoteo, kTito, kFilemón chu kHebreos.)