યાકૂબ, યહૂદા, પિતર અને યોહાને સાત પત્રો લખ્યા હતા. યાકૂબ અને યહૂદા ઈસુના સાવકા ભાઈ હતા. પિતર અને યોહાન ઈસુના બાર ખાસ શિષ્યોમાંના હતા. તેઓએ લખેલા પત્રો ગ્રીક શાસ્ત્રમાં જોવા મળે છે. એ પત્રો તેઓના નામ પરથી ઓળખાય છે. એ પત્રોથી યહોવા અને તેમના રાજ્યને વળગી રહેવા ઈશ્વરભક્તોને ઉત્તેજન મળે છે.

શ્રદ્ધાનો પુરાવો આપો. ‘હું ઈશ્વરમાં માનું છું,’ એમ કહેવું જ પૂરતું નથી. એ વાણી-વર્તનમાં પણ દેખાઈ આવવું જોઈએ. યાકૂબે લખ્યું: ‘કાર્યો વગર શ્રદ્ધા મરેલી છે.’ (યાકૂબ ૨:૨૬) દુઃખ-તકલીફોમાં પણ ઈશ્વરમાં શ્રદ્ધા રાખવાથી સહનશક્તિ વધે છે. સારા નિર્ણય લેવા પ્રાર્થનામાં બુદ્ધિ માંગશો તો ઈશ્વર જરૂર આપશે. ધીરજ રાખવાથી યહોવાની કૃપા મળે છે. (યાકૂબ ૧:૨-૬, ૧૨) યહોવાને જ વળગી રહેશો તો, તે જરૂર મદદ કરશે. યાકૂબે લખ્યું: ઈશ્વરને સારી રીતે ઓળખો, તો તે તમને સારી રીતે ઓળખશે.—યાકૂબ ૪:૮.

ઈશ્વરમાં શ્રદ્ધા મજબૂત હશે તો, જીવનમાં આવતી લાલચો અને વ્યભિચાર જેવાં ખોટાં કામોથી દૂર રહી શકશો. યહૂદાના જમાનામાં લોકો બગડી ગયા હતા. ઈશ્વરભક્તો એની અસરમાં ન આવે એટલે યહૂદાએ તેઓને લખ્યું: શ્રદ્ધા જાળવી રાખવા સખત મહેનત કરો.—યહૂદા ૩.

સારા સંસ્કાર રાખો. યહોવા ચાહે છે કે તેમના ભક્તો શુદ્ધ રહે, એટલે કે ખોટાં કામોથી દૂર રહે. પિતરે લખ્યું: ‘સર્વ પ્રકારનાં આચરણમાં પવિત્ર થાઓ. કેમકે લખેલું છે, કે હું યહોવા પવિત્ર છું, માટે તમે પવિત્ર થાઓ.’ (૧ પિતર ૧:૧૫, ૧૬) પિતરે પછી આમ જણાવ્યું, ‘ખ્રિસ્તે તમારે માટે ઘણું સહન કર્યું. તમે તેમને પગલે ચાલો, એ માટે તેમણે તમને નમૂનો આપ્યો છે.’ (૧ પિતર ૨:૨૧) ખરું કે ઈશ્વરના ધોરણો પ્રમાણે જીવવું સહેલું નથી. પણ એનાથી ‘અંતઃકરણ શુદ્ધ’ રહે છે. (૧ પિતર ૩:૧૬, ૧૭) પિતરે એ પણ અરજ કરી કે ખોટાં કામો ન કરો. વાણી-વર્તન સારાં રાખો. ભક્તિમાં મંડ્યા રહો. દુષ્ટ જગતનો ઈશ્વર નાશ કરે એ દિવસની રાહ જુઓ. એવા નવા યુગની રાહ જુઓ જ્યાં ‘ન્યાયીપણું વસશે.’—૨ પિતર ૩:૧૧-૧૩.

પ્રેમ બતાવો. પ્રેરિત યોહાને લખ્યું કે “ઈશ્વર પ્રેમ છે.” તેમણે સમજાવ્યું કે ઈશ્વરને માણસ પર બેહદ પ્રેમ છે. માણસના પાપ ભૂંસી નાંખવા ઈશ્વરે પોતાના દીકરા ઈસુનું પણ બલિદાન આપી દીધું. એ જાણીને ઈશ્વરભક્તોએ શું કરવું જોઈએ? યોહાને લખ્યું: “વહાલાંઓ, જો ઈશ્વરે આપણા પર એવો પ્રેમ રાખ્યો, તો આપણે પણ એકબીજા પર પ્રેમ રાખવો જોઈએ.” (૧ યોહાન ૪:૮-૧૧) યહોવાના ભક્તો એકબીજાની સંભાળ રાખીને, તેઓ માટે સમય આપીને આવો પ્રેમ બતાવી શકે.—૩ યોહાન ૫-૮.

યહોવા માટે તેમના ભક્તો કેવી રીતે પ્રેમ બતાવી શકે? યોહાને લખ્યું: ‘આપણે ઈશ્વરની આજ્ઞાઓ પાળીએ, એ જ ઈશ્વર પરનો પ્રેમ છે. તેમની આજ્ઞાઓ ભારે નથી.’ (૧ યોહાન ૫:૩; ૨ યોહાન ૬) ઈશ્વર ખાતરી આપે છે કે તેમના કહેવા પ્રમાણે જીવે છે, તેઓને તે પ્રેમ બતાવશે. તેઓને હંમેશ માટેનું ‘જીવન આપશે.’—યહૂદા ૨૧.

—આ માહિતી યાકૂબ; ૧ પિતર; ૨ પિતર; ૧ યોહાન; ૨ યોહાન; ૩ યોહાન; યહૂદામાંથી છે.