YAKOBE ndi Yuda ŵenga avurwa aku Yesu, wosi anyinawu ŵenga amoza. Petro ndi Yohane ŵenga amoza mwa akutumika 12 aku Yesu. Anthurumi anayi ŵenaŵa, angulemba makalata ngakukwana 7 ngo ngasanirika mu Malemba nga Chigiriki nga Chikhristu. Kalata yeyosi ye ndi zina la munthu yo wakuyilemba. Ulongozgi wakuuzirika wo usanirika mu makalata ngenanga, ungulembeke kuti uwovyi Akhristu kuti alutirizgi kusunga ukongorekwa wawu kwaku Yehova ndipuso kuja akugomezgeka ku Ufumu waki.

Akhristu Atenere Kulongo Chivwanu. Kukamba waka kuti nde ndi chivwanu nkhwakukwana cha. Chivwanu chayichu chiwoneka ndi nchitu zaki. Yakobe wakulemba kuti, ‘chivwanu chambula nchitu nchakufwa.’ (Yakobe 2:26) Kuchita vinthu mwakugomezgeka asani takumana ndi masuzgu kutitichitisa kuti tilutirizgi kukunthiyapu. Kuti Mkhristu waluti panthazi, wakhumbika kupempha Chiuta kuti wamupaski zeru ndipu watenere kuja ndi chigomezgu chosi kuti Chiuta wamupaskengi. Kukunthiyapu kuchitisa munthu kuti wayanjiki ndi Chiuta. (Yakobe 1:​2-6, 12) Asani ndi chivwanu munthu wakusopa Chiuta walutirizga kuja wakugomezgeka, Yehova Chiuta nayu waja wakugomezgeka kwaku iyu. Lemba la Yakobe likamba kuti: “Ndereni kufupi kwaku Chiuta, ndipo wanderenge kufupi kwinu.”​—Yakobe 4:8.

Chivwanu cha Mkhristu chitenere kuja chakukho kuti chimuwovyi kukana mayeseru ndi vinthu vo vingatichitisa kuti wachiti mijalidu yiheni. Chifukwa cha mijalidu yiheni yo yachitikanga, yinguchitisa Yuda kuti wachiski Akhristu anyaki kuti ‘alimbi pa chivwanu.’​—Yuda 3.

Akhristu atenere kuja ndi mijalidu yamampha. Yehova wakhumba kuti ŵanthu wo atimusopa aje atuŵa, kung’anamuwa kuja achanda mu vigaŵa vosi. Petro wakulemba kuti: “Muŵe ŵakupaturika mu kajaridu kose, chifukwa kwalembeka: ‘Mukaŵanga ŵakupaturika, pakuti nde [Yehova] wakupaturika ine.’” (1 Petro 1:​15, 16) Akhristu ŵe ndi chakuwoniyapu chamampha chakuti angayeza. Petro wakukamba kuti: “Pakuti Khristu nayo wangukomwa chifukwa chinu, ndipo wamsiyiyani chanduru kuti mundondoloskemo mu menderu ghake.” (1 Petro 2:21) Chinanga kuti Akhristu angasuzgika chifukwa cha kulondo marangu ngaku Chiuta, yiwu aja ndi “njuŵi yamampha.” (1 Petro 3:​16, 17) Petro wachiska Akhristu kuti ajengi ndi jalidu lamampha ndipuso nchitu zakulongo kujipereka kwaku Chiuta po alindizga zuŵa laku Chiuta la cheruzgu ndi charu chifya chalayizgu mwenimo ‘mwazamuja urunji.’​—2 Petro 3:​11-13.

Akhristu atenere kwanja anyawu kweniso Yehova. Yohane wakulemba kuti: “Chiuta nchanju.” Wakutumika mwenuyu, walongo kuti Chiuta wangulongo chanju chikulu pakutumiza mwana waki Yesu, nge ‘sembi ya vilakwa vidu.’ Kumbi Akhristu atenere kuyiwona wuli nkhani yeniyi? Yohane wakonkhoska kuti: “Mwaŵakwanjiwa, asani Chiuta wangwanja ifwe viyo, nafwe so titenere kwanjana.” (1 Yohane 4:​8-11) Nthowa yimoza yakulongole chanju nkhuja ndi mtima wakulonde Akhristu anyidu.​—3 Yohane 5-8.

Kumbi ŵanthu wo asopa Yehova angamulongo wuli chanju? Yohane wamuka kuti: “Chifukwa chenichi nchanju cho chaku Chiuta, kuti tisunge marangu ghake, ndipo marangu ghake gho kuti ngazitu cha.” (1 Yohane 5:3; 2 Yohane 6) Wo avwiya Chiuta asimikizirika kuti Chiuta walutirizgengi kuŵayanja ndipu wazakuŵapaska “umoyu wamuyaya.”​—Yuda 21.

​—Nkhani iyi yatuliya pa Yakobe; 1 ndi 2 Petro; 1, 2 ndi 3 Yohane; Yuda.