ИАКОВ но Иуда Иисуслэн одӥг анайлэсь вордӥськем вынъёсыз, нош Пётр но Иоанн — солэн апостолъёсыз. Ваньзэ ӵош лыдъяно ке, соос сизьым гожтэт гожтӥзы, кудъёсыз Христиан Грек Гожтэмъёс пӧлы пыризы. Котькудӥз соос пӧлысь гожтӥсезлэн нимыныз нимамын. Та гожтэтъёсысь Инмарлэн духеныз вордскытэм визьноданъёс христианъёслы юртто Иеговалы но солэн Эксэйлыкезлы оскымон кыльыны.

Оскондэс ужъёсыныды возьматэ. Инмарлы оскиськомы шуыса вераны гинэ — ӧжыт. Зэмос оскон ужъёсын возьматӥське. Иаков гожтэ: «Оскон но ужъёстэк улыны уг быгаты» (Иаков 2:26). Шуг-секытъёсын кыдатэм оскон чидан будэтэ. Оскымон кылён понна христианъёслы Инмарлэсь визьлыксэ куроно но осконо, со куронзэс быдэстоз шуыса. Соос, кинъёс чидасесь кылё, Инмарлы ярамон луо (Иаков 1:2—6, 12). Осконын юнэсь луыса, дун-чылкытэсь кылиськомы ке, Иегова милемын луоз. «Инмарлы матэ кариське,— шуэ Иаков,— Со но тӥляд матады лыктоз» (Иаков 4:8).

Оскон юн луыны кулэ, ми визь сынаськонъёслы но азон-калгонлы пумит сылыны мед быгатомы шуыса. Валаса, макем сӧрыны быгато котырысь адямиос, Иуда христианъёсты осконзы понна вань кужмысьтызы нюръяськыны ӧтиз (Иуда 3).

Асьтэды адӟем карымон возе. Иегова вите, солэн ужась-тыршисьёсыз дун-чылкытэсь, яке котьма ласянь адӟем карымонэсь, мед луозы шуыса. Пётр Иеговалэсь кылъёссэ тодамы вайытэ: «Дун-чылкытэсь луэлэ, Мон дун-чылкыт уго». Соин ик со быдэс улон-вылонамы дун-чылкыт луыны ӧте (1 Пётр 1:15, 16). Христианъёслэн умой адӟем каронзы вань. «Христос но асьме понна курадӟон чидаз, Солэн пытьы кузяз мед мыномы шуыса, асьмелы адӟем карон кельтӥз»,—вера апостол (1 Пётр 2:21). Инмарлэн эсэпъёсызъя улыса, христианъёс шуг-секытъёсын пумиськыны быгато ке но, соослэн возьытлыксы чылкыт кыле (1 Пётр 3:16, 17). Пётр ӧте христианъёсты асьсэды адӟем карымон возьыны но Инмарлы оскымон луыны, Инмарлэсь суд нуналзэ но сӥзем выль дунеез возьмаса, кытын «шонерлык улэ» (2 Пётр 3:11—13).

Яратондэс возьматэ. «Инмар — со яратон»,— гожтэ Иоанн. Апостол вера, Инмар, Иисусэз «сьӧлыкъёсмылэсь мозмытон понна» ыстыса, быдӟым яратонзэ возьматӥз шуыса. Кызьы христианъёс Инмарлэн яратонэзлы вазиськыны кулэ? Иоанн валэктэ: «Гажаноосы! Инмар асьмемыз озьы яратӥз бере, асьмеос но огмес огмы яратыны кулэ» (1 Иоанн 4:8—11). Таӵе яратонэз возьматыны одӥгез луонлык — куно карись луон (3 Иоанн 5—8).

Нош кызьы христианъёс Иеговаез яратэмзэс возьматыны быгато? Иоанн валэктон сётэ: «Инмарлэсь курон-косонъёссэ быдэсъяса улонмы возьматэ Инмарез яратэммес. Солэн курон-косонъёсыз секытэсь ӧвӧл» (1 Иоанн 5:3; 2 Иоанн 6). Библия оскытэ, Инмарлэсь кылзӥськыса улӥсьёс солэн яратоназ улозы но пырак улон басьтозы шуыса (Иуда 21, ВД).

Пыкиськемын: Иаков; 1 но 2 Пётр; 1, 2 но 3 Иоанн; Иуда.