SANTIAGO yéetel Judaseʼ u majan íitsʼnoʼob Jesús, Pedro yéetel Juaneʼ u apostoloʼob. Tu kantúuliloʼobeʼ tu tsʼíibtoʼob siete cartaʼob yáanal u nuʼuktaj Dios, leloʼobaʼ tiaʼanoʼob xan ichil le Kiliʼich Tsʼíiboʼob ich Griegooʼ; cada upʼéeleʼ ku bisik u kʼaabaʼ le máax tsʼíibtoʼ. Letiʼobeʼ tu tsʼíibtoʼob le cartaʼobaʼ utiaʼal ka u yáantoʼob le sukuʼunoʼob ka chúukpajak u yóol u meyajtoʼob Diosoʼ.

Unaj k-eʼesik yaan k-fe. Maʼ chéen unaj u yaʼalik máak yaan u fejiʼ, baʼaxeʼ unaj u yeʼesik yéetel baʼaxoʼob ku beetik. Jeʼex u yaʼalik Santiagoeʼ: «Le oksaj óolaloʼ wa maʼ tu yeʼesaʼal yéetel utsil meyajoʼobeʼ kimen» (Santiago 2:26). Le máax ku chúukpajal u yóol u aktáant le talamiloʼoboʼ ku maas muʼukʼaʼantal u fe. Tsʼoʼoleʼ, jeʼel u páajtal u kʼáatik naʼatil tiʼ Dioseʼ, tumen u yojel yaan u tsʼaʼabal tiʼ. Wa ku chúukpajal u yóol u meyajt Jéeobaeʼ yaan u kʼamik yaʼab utsiloʼob (Santiago 1:2-6, 12). Dioseʼ ku yáantik le máaxoʼob ku chúukpajal u yóol u meyajtoʼoboʼ. Le oʼolal Santiagoeʼ ku yaʼalik: «Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex» (Santiago 4:8).

Le máaxoʼob meyajtik Diosoʼ unaj u muʼukʼaʼankúuntik u fejoʼob utiaʼal maʼ u lúubloʼob tiʼ baʼax kʼaas. Judaseʼ, kuxlaj tu kʼiiniloʼob jach yaʼab xan u beetaʼal baʼaloʼob kʼaastak, le oʼolal tu yaʼalaj: «Baʼatelnakeʼex tu yoʼolal le oksaj óolal[oʼ]» (Judas 3).

Unaj k-bisik upʼéel kuxtal limpio. Jéeobaeʼ ku yaʼalik tiʼ máaxoʼob meyajtik ka u bisoʼob upʼéel kuxtal limpio mantatsʼ. Pedroeʼ tu tsʼíibtaj: «Kuxleneʼex ich kiliʼichil tumen Jajal Dios máax tʼaneʼexeʼ kiliʼich; tumen le Kiliʼich Tsʼíiboʼ ku yaʼalik: Kiliʼichchajkeʼex, tumen teneʼ kiliʼichen» (1 Pedro 1:15, 16). Utiaʼal lelaʼ, unaj k-ilik k-beetik jeʼex tu beetil Cristoeʼ, Pedroeʼ ku yaʼalikeʼ letiʼeʼ tu tsʼáaj «jumpʼéel kaʼansaj, utiaʼal ka [kuxlakoʼon] jeʼel bix kuxlajik letiʼoʼ» (1 Pedro 2:21). Kex yaan kʼiin yaan u chan talamtal k-beetik baʼax ku yaʼalik Dioseʼ, le baʼax maas kʼaʼananoʼ letiʼe ka yanaktoʼon jeetsʼelil t-tuukuloʼ (1 Pedro 3:16, 17). Pedroeʼ ku yaʼalikeʼ maʼ unaj u xuʼulul u bisik máak upʼéel kuxtal limpioiʼ, yéetel unaj u yeʼesik yéetel baʼaxoʼob ku beetkeʼ jach u kʼubmaj u yóol u meyajt Dios le táan u páaʼtik u kʼuchul u kʼiinil le xuʼulsajil bey xan le túumben yóokʼol kaab, «tuʼux tuláakal baʼal toj» kun beetbiloʼ (2 Pedro 3:11-13).

Unaj k-eʼesik yaabilaj: Juaneʼ ku yaʼalik: «Jajal Dioseʼ yaakunaj». Jéeobaeʼ tu yeʼesaj jach u yaabiltmoʼon le ka tu túuxtaj u Hijo kíimil t-oʼolal «utiaʼal ka páatak u saʼatsaʼal k-kʼebanoʼob». ¿Baʼax unaj u péekskoʼon k-beet le yaabilaj tu yeʼesajtoʼon Diosoʼ? Juaneʼ ku yaʼalik: «Sukuʼuneʼex, wa Jajal Dios bey tu yaabiltajoʼonoʼ, toʼon xaneʼ unaj k-yaabiltikba t-baatsil» (1 Juan 4:8-11). Upʼéel bix k-eʼesik yaabilaj tiʼ le sukuʼunoʼoboʼ letiʼe ka k-eʼes utsil tiʼoboʼ (3 Juan 5-8).

¿Bix túun u yeʼesik le cristianoʼob u yaabiltmoʼob Jéeobaoʼ? Juaneʼ ku yaʼalik: «U yaabiltaʼal Jajal Dioseʼ u yuʼubajtʼantaʼal u yaʼalmaj tʼaanoʼob; yéetel u yaʼalmaj tʼaanoʼobeʼ maʼ talamoʼobiʼ» (1 Juan 5:3; 2 Juan 6). Máaxoʼob beetik baʼax ku yaʼalik Dioseʼ u yojloʼobeʼ maʼ kun xuʼulul u yaabiltaʼaloʼob tumen Dios, yéetel yaan u tsʼaʼabal «kuxtal minaʼan u xuul» tiʼob (Judas 21).

(Chʼaʼabaʼan tiʼ Santiago, 1 Pedro, 2 Pedro, 1 Juan, 2 Juan, 3 Juan yéetel Judas.)