RI KʼISBʼAL wuj re ri Utzij ri Dios —Revelación, o Apocalipsis— kuya kubʼsal kʼuʼx chike ri winaq. Are ri apóstol Juan xtzʼibʼanik, chupam e kʼo kʼi kʼutwachinik che kkibʼij ri petinaq xuqujeʼ kkʼis ubʼanik ri kʼutwachinik chiʼ ri Jehová kubʼan ronojel ri xraj nabʼe chike ri winaq.

Pa ri nabʼe kʼutwachinik, ri Jesús chiʼ walajinaq chi chkixoʼl ri kaminaqibʼ xuya kubʼsal kʼuʼx xuqujeʼ pixbʼenik chike kʼi congregaciones. Ri jun chik kukʼut ri utem ri Dios pa ri kaj xuqujeʼ che kʼo kʼi ángeles chuxukut.

Ri Apocalipsis kubʼij chiʼ naj ta chi kraj che ktzʼaqat ubʼanik ri kraj ri Dios, ri Alaj Chij (Jesucristo) kukʼam jun wuj che kʼo wuqubʼ tzʼapibʼal re. Chiʼ xujaq ri kajibʼ nabʼe, keʼel loq kajibʼ ajkejabʼ. Ri nabʼe are ri Jesús che Ajawinel chik pa ri kaj che bʼenaq chirij jun saq kej. Ri nikʼaj chik e kʼo chirij nikʼaj chik kej che jalajoj kicolor, e are jun kʼutbʼal re chʼoj, wiʼjal xuqujeʼ yabʼil, are wariʼ ri tajin kkibʼan ri winaq che naj ta chik kraj che ksachisax uwach. Chiʼ xjaq ri uwuq tzʼapibʼal xtataj wuqubʼ uchʼabʼal trompeta, che kchʼaw chirij kʼi kʼax che kutaq lo ri Dios. Rukʼ waʼ kʼo chi waqibʼ kʼax, o royowal ri Dios.

Xuqujeʼ, ri Juan xrilo chiʼ xalax jun akʼal, che are kraj kubʼij che xalax ri Rajawbʼal ri Dios pa ri kaj. Xbʼan jun chʼoj, ri Satanás rukʼ ri itzel taq uxlabʼal xeʼesax lo pa ri kaj xuqujeʼ xekʼaq lo pa ri uwach Ulew. Tekʼuriʼ xtataj jun koʼalaj chʼabʼal che xubʼij: «Kʼax iwe ri ix ri ix kʼo cho ri uwach ulew». Rumal che ri Itzel kuchʼobʼo che xa kebʼ oxibʼ qʼij chik kʼo che rumal laʼ petinaq royowal (Apocalipsis 12:12).

Xilitaj chi jumul ri Jesús pa ri kaj junam rukʼ jun alaj chij, che uxukut e kʼo 144.000 winaq che e chaʼom «kebʼajawin na rukʼ». Are Apocalipsis kkʼutuwik che ri ketobʼan rukʼ ri Jesús che je taneʼ che e ral ri ixoq e 144.000 winaq (Apocalipsis 14:1; 20:6).

Ri ajawinelabʼ rech ri uwach Ulew kkimulij kibʼ pa ri Armagedón, o «ri chʼoj re ri nimalaj uqʼij ri Dios ri kʼo ronojel ukuʼinem», rech kechʼojin rukʼ ri achi che kʼo chirij ri saq kej, Jesús, xuqujeʼ ri e rajchʼoj che e kʼo pa ri kaj. ¿Jas kel wi ri chʼoj? Ksachisax kiwach ri ajawinelabʼ xuqujeʼ ktzʼapix ri Satanás. Ri Jesús rukʼ ri e 144.000 kkiqʼat tzij puwiʼ ri uwach Ulew pa 1.000 junabʼ, chiʼ kkʼisik, ri Satanás ksachisax uwach (Apocalipsis 16:14; 20:4).

¿Jas kubʼan na ri uqʼatbʼal tzij ri Jesús re 1.000 junabʼ chike ri winaq che kenimanik? Ri Juan xutzʼibʼaj: «[Ri Jehová] kusuʼ kʼu na ronojel ri uwaʼl kiwach ri e oqʼinaq. Man kʼo ta chi kamikal. Man kʼo ta chi bʼis, man kʼo ta chi kuraq uchiʼ rumal kʼax, ma wi kʼo chi qʼoxowem. Xebʼokʼow kʼut ri nabʼe taq jastaq» (Apocalipsis 21:4). ¡Ri Ulew kux chi na jun jeʼlalaj uwach!

Rukʼ waʼ, ri wuj Apocalipsis xukʼis ubʼixik ri kutzijoj ri Utzij ri Dios: rumal ri Rajawbʼal ri Mesías, ri Jehová kubʼan saq che ri ubʼiʼ xuqujeʼ qas kutikibʼa che xaq xiw areʼ taqal che kuqʼat tzij.

(Esam chupam ri wuj Apocalipsis.)