Si Jehova naglalang kang Adan ug Eva nga may paglaom nga mabuhi sa walay kataposan sa Paraiso. Gipasipalahan ni Satanas ang ngalan sa Diyos ug iyang gikuwestiyon ang katungod sa Diyos sa pagmando. Si Adan ug Eva miduyog kang Satanas sa pagrebelde batok sa Diyos, nga miresulta sa sala ug kamatayon dili lamang alang kanila kondili sa tanan usab nilang kaliwatan

Gihukman ni Jehova ang mga rebelde ug misaad nga motungha ang usa ka Manluluwas, o Binhi, nga magwagtang kang Satanas ug sa tanang epekto sa pagrebelde ug sa sala

Si Jehova nagsaad kang Abraham ug kang David nga maggikan kanila ang Binhi, o Mesiyas, nga magmando ingong Hari sa walay kataposan

Gigiyahan ni Jehova ang mga propeta sa pagtagna nga ang Mesiyas magwagtang sa sala ug kamatayon. Kauban sa iyang mga isigkamagmamando, siya mahimong Hari sa Gingharian sa Diyos, nga magtapos sa gubat, sakit, ug bisan sa kamatayon

Gipadala ni Jehova ang iyang Anak sa yuta ug iyang gipaila si Jesus ingong Mesiyas. Si Jesus nagsangyaw bahin sa Gingharian sa Diyos ug naghalad sa iyang kinabuhi. Dayon gibuhi siya ni Jehova ingong usa ka espiritu

Sa langit, si Jehova nag-entrono sa iyang Anak ingong Hari, nga nagpaila sa pagsugod sa kataposang mga adlaw sa presenteng sistema sa mga butang. Si Jesus naggiya sa iyang mga tinun-an sa yuta samtang sila nagsangyaw bahin sa Gingharian sa Diyos sa tibuok yuta

Si Jehova nagsugo sa iyang Anak nga ipaabot sa yuta ang pagmando sa Gingharian. Ang Gingharian magpukan sa tanang daotang mga gobyerno, magpasig-uli sa Paraiso, ug magdala sa matinumanong katawhan ngadto sa kahingpitan. Ang katungod ni Jehova sa pagmando mapamatud-an nga matarong, ug ang iyang ngalan mabalaan hangtod sa walay kataposan