Ni̱ ka̱va̱ʼa Jeová Ndio̱s, Adán xíʼín Evá, ta ni̱ si̱ʼa si íchi̱ nuu̱ ná ña̱ kutaku na ndijaá táʼa̱n kivi̱ nuu̱ Ñúʼu̱ ñúchí. Ni̱ kaʼa̱n kini Satanás sa̱ʼá kivi̱ Ndio̱s, ta ni̱ kaʼa̱n kuáchi̱a̱n sa̱ʼá ña̱ á mií sí kánian kaʼnda chuun. Ni̱ sinajo̱ʼo Adán xíʼín Evá ña̱ ni̱ kaʼa̱n Ti̱míaʼá xíʼín ná, ta sa̱ʼá ña̱yóʼo ni̱ ka̱sáʼá xíʼi̱ ndijaá na̱yivi, ta ni̱ ka̱sáʼá ió kua̱chi ndijaá ná

Ni̱ kaʼa̱n Ndio̱s ña̱ ndoʼo na̱ ko̱ ní sínajo̱ʼo si, ta ni̱ kaʼa̱n si ña̱ tandaʼá sí iin tata kixi jánaá nuu̱ Satanás, ta jándíʼi ta yóʼo ña̱ ndóʼo ini na̱yivi sa̱ʼá ña̱ ko̱ ní sinajo̱ʼo Adán xíʼín Evá ña̱ ni̱ kaʼa̱n Ndio̱s, ta sa̱ʼá kua̱chi

Ni̱ ka̱ndo̱o Ndio̱s xíʼín Abraham, ta xíʼín David ña̱ tein na̱ veʼe na kana ta̱ kúú tata ni̱ kaʼa̱n Ndio̱s tandaʼá sí kixi á Mesías, ta̱ kaneʼe chuun ndijaá táʼa̱n kivi̱

Na̱ profetá ni̱ ka̱chúun Jeová Ndio̱s já ni̱ ka̱stu̱ʼun si ña̱ jándíʼi Mesías nu̱ú kua̱chi, ta ña̱ xíʼi̱ na̱yivi, ta mií rá kukuu Rey nuu̱ Gobiernó Ndio̱s. Ta jaá ní koo java ka̱ na̱yivi kaʼnda chuun xíʼín rá, jaá jándíʼi na nu̱ú tu̱ndóʼó ña̱ saʼní táʼa̱n na̱yivi, nu̱ú kueʼe̱ ta ña̱ xíʼi̱ na̱yivi

Ni̱ ka̱stu̱ʼun Jeová Ndio̱s ña̱ Jesús kúú Mesías. Ta ni̱ ta̱ndaʼá sí de̱ʼe sí Jesús ni̱ kixi si nuu̱ Ñúʼu̱ yóʼo, já ni̱ ja̱náʼa̱ si saʼa̱ Gobiernó Ndio̱s, ta ni̱ si̱ʼa si miísí ni̱ xiʼi̱ si saʼa̱ ndijaá táʼa̱n na̱yivi. Tá ni̱ ndiʼi jaá ni̱ ja̱nátaku ñaʼá Jeová Ndio̱s tátu̱ʼun iin espíritu

Ni̱ si̱ʼa Ndio̱s chuun nuu̱ Cristó já ná kukuu si Rey indiví, ta yóʼo kúú nu̱ú ni̱ ka̱sáʼá kivi̱ nu̱jandíʼí nákaa̱ ñuyíví yóʼo. Chíndeé Jesús na̱ ndíko̱ si já kástu̱ʼun na saʼa̱ Gobiernó Ndio̱s nuu̱ iníí kúú ñuyíví

Yóʼo kúú nu̱ú kaʼa̱n Jeová Ndio̱s xíʼín de̱ʼe si Jesús ña̱ ná kasáʼá sí kaʼnda si chuun nuu̱ Ñúʼu̱ yóʼo. Jándíʼi Gobiernó Ndio̱s nuu̱ ndijaá gobiernó ñuyíví yóʼo, ta jándúu ñúchí tukuan nuu̱ Ñúʼu̱ yóʼo, ta jákúxoo ña kua̱chi nu̱ú na̱yivi ni̱ ka̱chúun ndaa̱ nuu̱ Ndio̱s. Ta ni iin kivi̱ ka̱ o̱ nándióko̱o na kaʼa̱n kuáchi̱ na̱ sa̱ʼá ña̱ mií vá Jeová ndio̱s kúú ta kánian kaʼnda chuun, ta iin ndée̱ vá nduvií kivi̱ sí