ប្រធានបទនៃគម្ពីរបរិសុទ្ធ សេចក្ដីសង្ខេប
ព្រះយេហូវ៉ាបង្កើតអាដាមនិងអេវ៉ាឲ្យមានជីវិតជារៀងរហូតក្នុងសួនឧទ្យាន។ សាថាននិយាយបង្កាច់បង្ខូចនាមរបស់ព្រះ ហើយចោទប្រកាន់លើសិទ្ធិគ្រប់គ្រងរបស់លោក។ អាដាមនិងអេវ៉ាចូលរួមជាមួយនឹងសាថាន ហើយបះបោរប្រឆាំងព្រះ នាំឲ្យពួកគេនិងកូនចៅមានអំពើខុសឆ្គងនិងសេចក្ដីស្លាប់
ព្រះយេហូវ៉ាកាត់ទោសពួកអ្នកបះបោរ ហើយសន្យាថានឹងមានអ្នកសង្គ្រោះម្នាក់ ឬពូជ ដែលនឹងមកកិនក្បាលសាថាន ហើយបំបាត់ចោលផលវិបាកទាំងអស់ដែលកើតចេញពីការបះបោរនិងភាពខុសឆ្គង
ព្រះយេហូវ៉ាសន្យានឹងអាប្រាហាំនិងដាវីឌ ថាពួកគេនឹងទៅជាបុព្វបុរសនៃពូជ ឬមេស្ស៊ី ដែលនឹងគ្រប់គ្រងជាស្ដេចជារៀងរហូត
ព្រះយេហូវ៉ាដឹកនាំអ្នកប្រកាសទំនាយឲ្យទាយថាមេស្ស៊ីនឹងបំបាត់ភាពខុសឆ្គងនិងសេចក្ដីស្លាប់។ ដោយមានអ្នកឯទៀតគ្រប់គ្រងជាមួយនឹងលោក នោះលោកនឹងគ្រប់គ្រងជាស្ដេចនៃរាជាណាចក្ររបស់ព្រះ ដែលនឹងធ្វើឲ្យលែងមានសង្គ្រាម ជំងឺ សូម្បីតែសេចក្ដីស្លាប់ក៏នឹងលែងមានដែរ
ព្រះយេហូវ៉ាចាត់បុត្រលោកមកផែនដី ហើយបញ្ជាក់ថាលោកយេស៊ូជាមេស្ស៊ី។ លោកយេស៊ូផ្សព្វផ្សាយអំពីរាជាណាចក្ររបស់ព្រះ ហើយឲ្យជីវិតលោកទុកជាគ្រឿងបូជា។ រួចមក ព្រះយេហូវ៉ាប្រោសលោកឲ្យរស់ឡើងវិញជាបុគ្គលវិញ្ញាណ
ព្រះយេហូវ៉ាតាំងបុត្រលោកជាស្ដេចនៅស្ថានសួគ៌ ហើយនោះបញ្ជាក់ថាគ្រាចុងក្រោយបង្អស់នៃរបៀបរបបពិភពលោកនេះ បានចាប់ផ្ដើមហើយ។ លោកយេស៊ូដឹកនាំ ពួកអ្នកកាន់តាមលោក កាលដែលពួកគេ ផ្សព្វផ្សាយរាជាណាចក្រ របស់ព្រះនៅទូទាំង ផែនដី
ព្រះយេហូវ៉ាបង្គាប់បុត្រលោកឲ្យចាប់ផ្ដើមគ្រប់គ្រងផែនដីតាមរយៈរាជាណាចក្រ។ រាជាណាចក្រនេះនឹងកម្ទេចចោលរដ្ឋាភិបាលទាំងអស់ ហើយរៀបចំសួនឧទ្យាន ព្រមទាំងធ្វើឲ្យមនុស្សស្មោះត្រង់មានភាពល្អឥតខ្ចោះ។ សិទ្ធិគ្រប់គ្រងរបស់ព្រះយេហូវ៉ាបានត្រូវសឲ្យឃើញថាត្រឹមត្រូវ ហើយនាមរបស់លោកបានត្រូវធ្វើឲ្យបរិសុទ្ធជារៀងរហូត
