၁ ဖဲယဟိဝၤယွၤတ့လီၤ စီၤအၤဒၣ်ဒီးနီၢ်အံၣ်အုအခါ အဝဲသ့ၣ်အိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ်လီၤထူလီၤယိာ်လၢ ပၤရဒံစူးအပူၤလီၤ. မုၣ်ကီၤလံၢ်ကတိၤဒုၣ်ဒွဲၣ်စံးအၢယွၤအမံၤဒီး ထီဒါဝဲယွၤအတၢ်ခွဲးတၢ်ယာ်လၢကပၢတၢ်လီၤ. ဒ်မုၣ်ကီၤလံၢ်ပူထီၣ်ယွၤအသိး စီၤအၤဒၣ်ဒီးနီၢ်အံၣ်အုပူထီၣ်ဝဲယွၤအဃိ အဝဲသ့ၣ်ဒီးအဖိအလံၤတဖၣ် ဒိးန့ၢ်ဘၣ်တၢ်ဒဲးဘးဒီးတၢ်သံန့ၣ်လီၤ

၂ ယဟိဝၤယွၤ စံၣ်ညီၣ်ဝဲပှၤပူထီၣ်တၢ်တဖၣ်ဝံၤအလီၢ်ခံ ကစၢ်အၢၣ်လီၤအီလီၤဝဲလၢ ကဒုးအိၣ်ထီၣ်ဝဲတၢ်အုၣ်က့ၤခီၣ်က့ၤကစၢ်လၢအမ့ၢ် တၢ်အချံအသၣ်လီၤ. အဝဲကမၤဟးဂီၤကွံာ်ဝဲ မုၣ်ကီၤလံၢ်ဒီး ကတြူာ်ကွံာ်တၢ်ဒဲးဘးဒီး တၢ်အၢတၢ်သီလၢအဟဲကဲထီၣ်အသးခီဖျိလၢ ပှၤပူထီၣ်တၢ်အဃိန့ၣ်လီၤ

၃ ယဟိဝၤယွၤအၢၣ်လီၤဝဲ စီၤအၤဘြၤဟၣ်ဒီး စီၤဒၤဝံးလၢ တၢ်အချံအသၣ်လၢအမ့ၢ် မ့းၡံအၤ လၢကပၢတၢ်လီၤထူလီၤယိာ်ဒ် စီၤပၤအသိးန့ၣ် ကဟဲလီၤစၢၤလၢအဝဲသ့ၣ်လီၤ

၄ ယဟိဝၤယွၤဘိးထီၣ်ဝဲဝံတဖၣ်အသး ဒ်သိးကတဲဆိပာ်ဝဲလၢ မ့းၡံအၤန့ၣ်ကအုၣ်က့ၤခီၣ်က့ၤပှၤဟီၣ်ခိၣ်ဖိလၢ တၢ်ဒဲးဘးဒီးတၢ်သံလီၤ. မ့းၡံအၤကပၢတၢ်ဒ် စီၤပၤတဂၤလၢယွၤအဘီမုၢ်အပူၤလီၤ. ပှၤဂၤတဖၣ်ကပၢတၢ်ဒီးအီၤ ဒီးအဝဲသ့ၣ်ကမၤကတၢၢ်ကွံာ် တၢ်ဒုးတၢ်ယၤ, တၢ်ဆူးတၢ်ဆါ ဒီးတၢ်သံလီၤ

၅ ယဟိဝၤယွၤ ဆှၢလီၤအဖိခွါဆူဟီၣ်ခိၣ်ချၢလီၤ. တုၤလၢတၢ်ဆၢကတီၢ်ဘၣ်ဒီး အဝဲဒုးနဲၣ်ဖျါထီၣ်ဝဲလၢ ယ့ၣ်ၡူးန့ၣ်မ့ၢ် မ့းၡံအၤန့ၣ်လီၤ. ယ့ၣ်ၡူးစံၣ်တဲၤတဲလီၤဝဲ ယွၤအဘီအမုၢ်အဂ့ၢ်ဒီး လုၢ်ထီၣ်အသးသမူဒ် တၢ်လုၢ်တၢ်ပာ်အသိးလီၤ. တၢ်န့ၣ်အလီၢ်ခံ ယဟိဝၤယွၤမၤမူထီၣ်က့ၤအီၤဒ် ပှၤနီၢ်သးဖိတဂၤလီၤ

၆ ယဟိဝၤယွၤ ပာ်ထီၣ်အဖိခွါ ဒ်စီၤပၤလၢမူခိၣ် ဒီးမုၢ်နံၤခံကတၢၢ် စးထီၣ်အသးလီၤ. ယ့ၣ်ၡူးနဲၣ်လိဝဲ အပျဲၢ်အဘီၣ် ဒ်သိးအဝဲသ့ၣ် ကစံၣ်တဲၤတဲလီၤ ယွၤအဘီအမုၢ်တၢ်သးခုကစီၣ်လၢ ဟီၣ်ခိၣ်ဒီဘ့ၣ်အဂီၢ်န့ၣ်လီၤ

၇ ယဟိဝၤယွၤ နဲၣ်လိဝဲအဖိခွါလၢ ကစးထီၣ်ပၢဝဲဟီၣ်ခိၣ်န့ၣ်လီၤ. ဘီမုၢ်အံၤကမၤဟးဂီၤကွံာ် တၢ်ပၢတၢ်ပြးလၢ အအၢသီခဲလၢာ်ဝံၤ ကမၤကဲထီၣ်ဟီၣ်ခိၣ်လၢပၤရဒံစူးလီၤ. ဒီးကမၤစၢၤပှၤဟီၣ်ခိၣ်ဖိလၢအတီတဖၣ်ဒ်သိးကလၢထီၣ်ပှဲၤထီၣ်ဝဲအဂီၢ်လီၤ. ယဟိဝၤယွၤကပာ်ဖျါထီၣ်ဝဲလၢအတၢ်ခွဲးတၢ်ယာ်လၢ ကပၢတၢ်န့ၣ် မ့ၢ်တၢ်လၢအကြၢးဝဲဘၣ်ဝဲဒီး ကစၢ်အမံၤကဘၣ် တၢ်ပာ်စီဆှံအီၤ လီၤထူလီၤယိာ်လီၤ