ຂ່າວສານຂອງຄຳພີໄບເບິນ—ພາບລວມ
ພະເຢໂຫວາສ້າງອາດາມແລະເອວາໂດຍມຸ່ງໝາຍໃຫ້ເຂົາເຈົ້າມີຊີວິດຕະຫຼອດໄປໃນອຸທິຍານ. ຊາຕານໃສ່ຮ້າຍພະເຈົ້າແລະຕັ້ງຂໍ້ສົງໄສໃນເລື່ອງສິດທິໃນການປົກຄອງຂອງພະອົງ. ອາດາມແລະເອວາຮ່ວມສົມທົບກັບຊາຕານໃນການກະບົດ ນຳເອົາບາບແລະຄວາມຕາຍມາສູ່ຕົວເອງແລະລູກຫຼານຂອງເຂົາເຈົ້າ
ພະເຢໂຫວາຕັດສິນລົງໂທດຜູ້ເຮັດຜິດແລະສັນຍາວ່າຜູ້ຊ່ວຍໃຫ້ລອດຫຼືເຊື້ອສາຍຈະມາເພື່ອທຳລາຍຊາຕານ ແກ້ໄຂຜົນພວງທັງໝົດຂອງການກະບົດແລະບາບ
ພະເຢໂຫວາສັນຍາກັບອັບລາຫາມແລະດາວິດວ່າເຂົາເຈົ້າຈະເປັນບັນພະບຸລຸດຂອງເຊື້ອສາຍຫຼືເມຊີ ຜູ້ທີ່ຈະປົກຄອງເປັນກະສັດຕະຫຼອດການ
ພະເຢໂຫວາດົນໃຈໃຫ້ພວກຜູ້ພະຍາກອນບອກລ່ວງໜ້າວ່າຜູ້ເປັນເມຊີຈະແກ້ໄຂຄວາມບາບແລະຄວາມຕາຍ. ພ້ອມດ້ວຍຜູ້ຮ່ວມປົກຄອງ ພະອົງຈະປົກຄອງໃນຖານະເປັນກະສັດແຫ່ງລາຊະອານາຈັກຂອງພະເຈົ້າ ເຊິ່ງຈະເຮັດໃຫ້ສົງຄາມ ຄວາມເຈັບປ່ວຍ ແລະແມ່ນແຕ່ຄວາມຕາຍໝົດສິ້ນໄປ.
ພະເຢໂຫວາສົ່ງລູກຊາຍຂອງພະອົງມາທີ່ແຜ່ນດິນໂລກແລະລະບຸຕົວພະເຍຊູວ່າເປັນເມຊີ. ພະເຍຊູປະກາດເລື່ອງລາຊະອານາຈັກຂອງພະເຈົ້າແລະມອບຊີວິດຂອງຕົນເອງເພື່ອເປັນຄ່າໄຖ່. ຈາກນັ້ນພະເຢໂຫວາໄດ້ປຸກພະເຍຊູໃຫ້ຟື້ນຄືນຈາກຕາຍໃນຖານະເປັນກາຍວິນຍານ
ພະເຢໂຫວາແຕ່ງຕັ້ງລູກຊາຍຂອງພະອົງໃຫ້ເປັນກະສັດໃນສະຫວັນ ເຊິ່ງເປັນສັນຍະລັກແຫ່ງການເລີ່ມຕົ້ນຂອງສະໄໝສຸດທ້າຍຂອງລະບົບນີ້. ພະເຍຊູຊີ້ນຳສາວົກຂອງພະອົງທີ່ຢູ່ແຜ່ນດິນໂລກໃນຖານະເປັນຜູ້ປະກາດລາຊະອານາຈັກຂອງພະເຈົ້າທົ່ວໂລກ
ພະເຢໂຫວາຊີ້ນຳລູກຊາຍຂອງພະອົງໃຫ້ນຳເອົາການປົກຄອງແຫ່ງລາຊະອານາຈັກມາສູ່ແຜ່ນດິນໂລກ. ລາຊະອານາຈັກຈະທຳລາຍລັດຖະບານທັງໝົດທີ່ຊົ່ວຮ້າຍ ກໍ່ຕັ້ງອຸທິຍານ ແລະພາມະນຸດທີ່ສັດຊື່ໄປສູ່ຄວາມສົມບູນແບບ. ສິດທິໃນການປົກຄອງຂອງພະເຢໂຫວາຈະໄດ້ຮັບການພິສູດວ່າຖືກຕ້ອງ ແລະຊື່ຂອງພະອົງຈະເປັນທີ່ນັບຖືບໍລິສຸດຕະຫຼອດການ
