Jehová kinchijchiua Adán uan Eva ika nemilis tlen amo keman tlamiskia itech se Xochitlal. Satanás amo kitlakaita itoka Jehová uan kijtoa amo kinamiki tlanauatis. Adán uan Eva kichiuaj ken Satanás uan ijkon kinpanoltilia nochtin tlaltikpaktlakamej tlajtlakol uan mikilis

ToTajtsin Dios kijtoa tlen kinpanos tlen amo tetlakamatkej uan kijtoa ke se Temakixtiani kixpolos Satanás uan kiyektlalis nochi tlen opanok ijkuak amo otetlakamatkej uan otlajtlakojkej

ToTajtsin Dios kinmiluia Abrahán uan David ke itech ixuiuan kisaskia Temakixtiani, Mesías tlen tlanauatis nochipa

Ika iteotlajtojkej, Jehová kitematiltia ke Mesías kitlajtlamis tlajtlakol uan mikilistli uan ye Tekiuajchiuas itech iTekiuajkayo toTajtsin Dios. Inauak ye noijki tekiuajchiuaskej sekimej tlaltikpaktlakamej, uan yejuan kitlajtlamiskej guerras, kokolismej uan mikilistli

Jehová kitematiltia ke Jesús ye Mesías. Ye okiualtitlanki ma tetlapoui itech iTekiuajkayo toTajtsin Dios uan ma motemaka pampa tlaltikpaktlakamej. Ijkuak omiki, Jehová okiyoliti ken se espíritu

ToTajtsin Dios kitlalia Cristo ken ueyi Tekiua ipan iluikak, uan peua itlamian tonalmej itech nochi tlamantli tlen amo kuali. Jesús kiyekana tetlapouilis itech iTekiuajkayo toTajtsin Dios tlen motematiltia ipan nochi Tlaltikpak

Jehová kinauatia iKone ma peua tlanauati ipan Tlaltikpak. Tekiuajkayotl kinmixpoloa tlaltikpaktekiuajkej, kichiuas Tlaltikpak ma mokuepa Xochitlal uan kichiuas ke tlaltikpaktlakamej tlen yolmelajkej ayakmo ma kipiakan tlajtlakol. Ayakmo moijtos kox kinamiki toTajtsin Dios ma tlanauati uan itoka moueyichiuas nochipa