१ यहोवा आदम र हव्वालाई प्रमोदवनमा अनन्त जीवनको आशासहित सृष्टि गर्नुहुन्छ। शैतान यहोवाको नाउँको निन्दा गर्छ र शासन गर्ने उहाँको अधिकारमाथि प्रश्न उठाउँछ। आदम र हव्वाले विद्रोहमा शैतानलाई साथ दिन्छन्‌ अनि आफू र आफ्ना सन्तानमाथि पाप र मृत्यु ल्याउँछन्‌

२ यहोवा विरोधीहरूलाई सजाय दिनुहुन्छ अनि विद्रोह र पापले निम्त्याएको सबै कुरा उल्टाउने र शैतानलाई नामेट गर्ने एक मुक्तिदाता वा सन्तान आउनेछन्‌ भनी प्रतिज्ञा गर्नुहुन्छ

३ यहोवा अब्राहाम र दाऊदलाई तिनीहरू सदासर्वदा शासन गर्ने ती सन्तान अथवा मसीहको पुर्खा हुनेछन्‌ भनी प्रतिज्ञा गर्नुहुन्छ

४ मसीहले पाप र मृत्युलाई हटाउनेछन्‌ भनी बताउन यहोवा भविष्यवक्ताहरूलाई उत्प्रेरित गर्नुहुन्छ। सहशासकहरूसित मिलेर तिनले परमेश्वरको राज्यको राजाको रूपमा शासन गर्नेछन्‌। यो राज्यले युद्ध, बिमारी र मृत्युसमेत हटाउनेछ

५ यहोवा आफ्ना पुत्रलाई यस पृथ्वीमा पठाउनुहुन्छ र येशूलाई मसीहको रूपमा चिनाउनुहुन्छ। येशू परमेश्वरको राज्यबारे प्रचार गर्नुहुन्छ र बलिदानको रूपमा आफ्नो जीवन अर्पण गर्नुहुन्छ। त्यसपछि यहोवा उहाँलाई आत्मामा पुनरुत्थान गर्नुहुन्छ

६ यहोवा आफ्ना पुत्रलाई स्वर्गमा राजा बनाउनुहुन्छ। यसले यस युगको आखिरी समय सुरु भएको संकेत गर्छ। पृथ्वीभरि परमेश्वरको राज्यको प्रचार गर्दा येशू आफ्ना अनुयायीहरूलाई डोऱ्याइ दिनुहुन्छ

७ यहोवा आफ्ना पुत्रलाई पृथ्वीमाथि शासन गर्ने निर्देशन दिनुहुन्छ। त्यस राज्यले सबै दुष्ट सरकारलाई चक्नाचूर पार्छ, प्रमोदवन स्थापना गर्छ र विश्वासी मानिसहरूलाई सिद्धतामा पुऱ्याउँछ। शासन गर्ने अधिकार यहोवाको हो भनेर प्रमाणित हुन्छ र उहाँको नाउँ सदाको लागि पवित्र पारिन्छ