Jehofa o bopa Adama le Efa ba e-na le tebelelo ya go phela ka mo go sa felego Paradeiseng. Sathane o thomeletša Modimo maaka a šoro gomme o belaela tshwanelo ya Gagwe ya go buša. Adama le Efa ba tlatša Sathane borabeleng, ba itlišetša sebe le lehu gotee le go bana ba bona

Jehofa o ahlola marabele gomme o holofetša gore go tla tsoga Mophološi goba Peu, yeo e tlago go fediša Sathane, ya fediša ditla-morago ka moka tša borabele le ya sebe

Jehofa o holofetša Aborahama le Dafida gore e tla ba bo-rakgolokhukhu ba Peu, goba Mesia, yeo e tlago go buša go ya go ile

Jehofa o budulela moporofeta go bolela e sa le pele gore Mesia o tla fediša sebe le lehu. A e-na le babuši-gotee le yena, o tla buša e le Kgoši ya Mmušo wa Modimo, woo o tlago go fediša dintwa, malwetši gaešita le lehu

Jehofa o romela Morwa wa gagwe lefaseng gomme o tsebatša Jesu e le Mesia. Jesu o ruta ka Mmušo wa Modimo gomme o gafa bophelo bja gagwe e le sehlabelo. Ke moka, Jehofa o mo tsoša e le sebopiwa sa moya

Jehofa o dira Morwa wa gagwe Kgoši kua legodimong, ka go rialo a bontšha go thoma ga mehla ya bofelo bja tshepedišo ye ya dilo. Jesu o hlahla balatedi ba gagwe ge ba bolela ka Mmušo wa Modimo lefaseng ka bophara

Jehofa o laela Morwa wa gagwe go tliša Mmušo wa gagwe lefaseng. Mmušo o pšhatla mebušo e mebe ka moka, o dira lefase Paradeise gomme o dira gore batho ba botegago ba phethagale. Tshwanelo ya Jehofa ya go buša e a phagamišwa gomme leina la gagwe le kge- thagatšwa go ya go ile