Jehova moakt Adam un Eva un jeft an de Utsecht, fa emma em Paradies to läwen. Soton moakt Gott eenen schlajchten Nomen un twiewelt aun Gott sien Rajcht to harschen. Adam un Eva stalen sikj opp Soton siene Sied un brinjen soo de Sind un dän Doot opp sikj un äare Nokomen.

Jehova veuadeelt de Schuldje. Hee vesprakjt eenen Rada, dee Soton venichten woat un dän Schoden wada woat gootmoaken, waut derch dän Wadastaunt un de Sind es veuasoakt worden.

Jehova vesprakjt Abraham uk David, see woaren de Väafoaren sennen von dän Nokomen, ooda Messias, dee fa emma woat Kjennich sennen.

Jehova sajcht derch Profeeten, daut de Messias Sind un Doot äwatsied schaufen woat. Dee woat met aundre toop en Gott sien Kjennichrikj harschen un woat met Kjrich, Krankheiten un soogoa dän Doot een Enj moaken.

Jehova schekjt sienen Sän Jesus oppe Ieed un bewiest kloa, daut dee de Messias es. Jesus moakt Gott sien Kjennichrikj bekaunt un jeft sien Läwen aus Opfa han. Jehova wakjt dän dan aus Jeist opp.

Jehova moakt sienen Sän em Himmel toom Kjennich. Doamet fangen de latste Doag von dise Welt aun. Vom Himmel ut leit Jesus siene Nofolja, dee oppe gaunze Ieed von Gott sien Kjennichrikj prädjen.

Jehova jeft sienen Sän dän Befäl, aul de beese Harschoften oppe Ieed to venichten un doano to seenen, daut de Ieed een Paradies woat. Unja sien Kjennichrikj woat doafäa jesorcht, daut jehuarsome Menschen volkomen woaren. Jehova sien Rajcht to harschen woat jerajchtfoadicht un sien Nomen woat fa emma jeheilicht.