Jeobá naʼnii Adán ga̱jma̱a̱ Eva ma̱ngoo naxnún dí ma̱ndoo makuwa kámuu mbiʼi náa Ku̱ba̱ʼ Mitsaan. Satanás naʼtáweñuʼ mbiʼyuu ndrígóo Jeobá ma̱ngoo niraxi á mu kaʼyoo Diúu̱ maʼtáñajunʼ. Adán ga̱jma̱a̱ Eva nunimbu̱ún rí naʼthí Gixa̱a̱, xúʼko̱ má nijkha̱ka̱gu̱u̱n xa̱bu̱ numbaaʼ maguaʼdá aʼkhá ga̱jma̱a̱ rí makhañún

Diúu̱ naʼthúún kaʼnii mugiʼniin bi̱ tunimbu̱ún ma̱ngaa nikudaminaʼ dí ma̱ʼkha̱ mbáa Tsígaʼ maʼnigámbáa Satanás ga̱jma̱a̱ maʼni̱i̱la rí nikiéʼkhun ma̱ngoo rí tunimbu̱ún

Diúu̱ nikudaminaʼ rí náa Abrahán ga̱jma̱a̱ David ma̱ʼkha̱ mbáa Tsígaʼ, ikhaa ni̱ndxu̱u̱ Mesías bi̱ maʼtáñajunʼ kámuu mbiʼi

Jeobá najmiu xa̱bu̱ gaʼyee mu muthi rí Mesías maʼnigámbáa aʼkhá ga̱jma̱a̱ rí nakháñuluʼ ma̱ngaa mani̱ndxu̱u̱ Rey náa Reino ndrígio̱o̱ Diúu̱. Ikhaa maʼtáñajunʼ gajmíi̱n mbá chimbaʼin xa̱bu̱, ikhaa gajmíi̱n xa̱bi̱i̱ munigámbáa aguʼ, nandii ga̱jma̱a̱ rí nakháñuluʼ

Jeobá nasngájmaa rí Jesús ni̱ndxu̱u̱ Mesías. Ikhaa nikuʼmaa náa tsu̱du̱u̱ Ku̱ba̱ʼ mu maʼtáraʼa numuu Reino ndrígóo Diúu̱ ma̱ngoo maxnáximinaʼ ga̱jma̱a̱ numún xa̱bu̱ numbaaʼ. Índo̱ nikháñu, Jeobá niʼni rí matanga̱a̱la xóo mbáa espíritu

Diúu̱ nagíiʼ Cristo xóo Rey mekhuíí, ma̱ngoo nagi̱ʼdu̱u̱ rí najkha̱ ratumuu mbiʼi rígi̱. Jesús xtáa nayajngoo rí miʼtáraʼa xúgíʼ numbaaʼ numuu Reino ndrígóo Diúu̱

Jeobá nakuʼmaa Aʼdióo rí magíʼdu̱u̱ maʼtáñajunʼ náa tsu̱du̱u̱ Ku̱ba̱ʼ. Reino naʼnigámbiin xúgínʼ Xa̱bu̱ Ñajunʼ bi̱ kuwa náa numbaaʼ, naʼni̱i̱la mbu̱júu̱ Ku̱ba̱ʼ Mitsaan ma̱ngoo naʼni dí xa̱bi̱i̱ bi̱ kuwa jmbu maguanu, dí ní xaguaʼdá aʼkhá. Ni̱mba̱ míʼtsú ní xaguma graxe̱ rí á mu Jeobá kaʼyoo maʼtáñajunʼ, ga̱jma̱a̱ mbiʼyuu mani̱ndxu̱u̱ santo ma̱ngaa kámuu gáni̱ndxu̱u̱ mikaʼwu