Yehovha u vumbe Adamu na Evha va ri ni ntshembo wo hanya hilaha ku nga heriki eParadeyisini. Sathana u hehle vito ra Xikwembu naswona u kanakane mfanelo ya xona yo fuma. Adamu na Evha va xandzuke na Sathana, va tivangela xidyoho ni rifu swin’we ni vana va vona

Yehovha u gweve vaxandzuki volavo kutani a tshembisa leswaku ku ta va ni Mukutsuri kumbe Mbewu leyi nga ta lovisa Sathana, yi herisa vuyelo hinkwabyo bya ku xandzuka ni xidyoho

Yehovha u tshembise Abrahama na Davhida leswaku va ta va vakokwa wa Mbewu kumbe Mesiya, loyi a nga ta va Hosi hilaha ku nga heriki

Yehovha u huhutele vaprofeta leswaku va vula ka ha ri emahlweni leswaku Mesiya u ta herisa xidyoho ni rifu. U ta va Hosi ya Mfumo wa Xikwembu a ri ni vafumi-kulobye naswona u ta herisa tinyimpi, vuvabyi ni rifu

Yehovha u rhumele N’wana wa yena emisaveni naswona u vule leswaku Yesu i Mesiya. Yesu u chumayele hi Mfumo wa Xikwembu naswona u nyikele hi vutomi bya yena tanihi xitlhavelo. Endzhaku ka sweswo Yehovha u n’wi pfuxile a ri xivumbiwa xa moya

Yehovha u veke N’wana wa yena exiluvelweni a va Hosi etilweni, leswi kombisaka ku sungula ka masiku yo hetelela ya mafambiselo lawa ya swilo. Yesu u kongomisa valandzeri va yena va laha misaveni loko va ri karhi va chumayela hi Mfumo wa Xikwembu emisaveni hinkwayo

Yehovha u lerise N’wana wa yena ku fuma misava. Mfumo wa yena wu ta lovisa mimfumo hinkwayo yo homboloka, wu simeka Paradeyisi naswona wu endla leswaku vanhu vo tshembeka va hetiseka. Mfanelo ya Yehovha yo fuma yi ta lweriwa naswona vito ra yena ri ta kwetsimisiwa hilaha ku nga heriki