Ginlarang ni Jehova hira Adan ngan Eva nga may paglaom nga mabuhi ha Paraiso tubtob ha waray kataposan. Ginpakaraot ni Satanas an ngaran han Dios ngan ginruhaduhaan an Iya katungod ha pagmando. Inupod hira Adan ngan Eva kan Satanas ha pagrebelde nga nagresulta hin sala ngan kamatayon para ha ira ngan ha ira mga anak

Ginsentensyahan ni Jehova an mga rebelde ngan nagsaad nga maabot an Manluluwas, o Binhi, nga magbubungkag kan Satanas ngan magwawara han mga resulta han pagrebelde ngan sala

Nagsaad hi Jehova kanda Abraham ngan David nga magigin kaapoy-apoyan hira han Binhi, o Mesias, nga magmamando sugad nga Hadi ha kadayonan

Gin-giyahan ni Jehova an mga propeta nga magtagna nga pagwawad-on han Mesias an sala ngan kamatayon. Kaupod han mga igkasi-magmarando han Mesias, maghahadi hiya ha Ginhadian han Dios nga magtatapos han girra, sakit, ngan kamatayon

Ginsugo ni Jehova an iya Anak, hi Jesus, nganhi ha tuna ngan iginpakilala hiya sugad nga an Mesias. Iginsangyaw ni Jesus an mahitungod han Ginhadian han Dios ngan iginhatag an iya kinabuhi sugad nga halad. Katapos, ginbanhaw hiya ni Jehova sugad nga espiritu

Ginpalingkod ni Jehova an Iya anak ha trono sugad nga Hadi ha langit, tigaman han pagtikang han kataposan nga mga adlaw hini nga sistema. Ginigiyahan ni Jesus an iya mga sumurunod ha tuna samtang iginsasangyaw nira an Ginhadian han Dios ha bug-os nga kalibotan

Ginigiyahan ni Jehova an iya Anak nga pahinaboon an pagmando han Ginhadian nganhi ha tuna. An Ginhadian magbubungkag han ngatanan nga magraot nga gobyerno, mag-iestablisar han Paraiso, ngan magpapahinabo han kahingpitan ha magtinumanon nga katawohan. Mabibindikar an katungod ha pagmando ni Jehova, ngan mababaraan an iya ngaran ha waray kataposan