Utenga wa m’Baibulo—Mwakata
Yehofa akumpanganya Adamu ni Hawa kuti atameje ni umi wangamala mu Paladaiso. Satana akulisakasya lina lya Mlungu, soni akusisya kuti Mlungu ali jwakuŵajilwa kulamulila. Adamu ni Hawa akukamulana ni Satana pakupanducila Mlungu, ni yeleyi yikutandikasya ulemwa ni ciwa kwa jemanjaji ni ŵanace ŵawo
Yehofa akupeleka cilango kwa ŵakupandukawo, soni akulocesya kuti cacipagwa Mkulupusyo kapena kuti Mbeju, jucacimjonanga Satana, ni kumasya yakuyicisya yosope ya kupanduka ni yaulemwa
Yehofa akumsimicisya Abulahamu ni Daudi kuti jemanjaji mu uŵelesi wawo mucipagwa Mbeju kapena kuti Masiya, jucaciŵa Mwenye ni kulamulilaga kwa ndaŵi jangamala
Yehofa akwakamucisya ŵakulocesya kuti alocesye kuti Masiya cacikamucisya kuti ulemwa ni ciwa yimale. Jwalakwe yimpepe ni ŵakumkamucisya cacilamulila mpela Mwenye mu Ucimwene wa Mlungu, wawucimasya ngondo, ulwele, ni ciwa
Yehofa akumtumisya Mwanace jwakwe ku cilambo capasi, soni akwamanyisya ŵandu kuti Mwanacejo ali Masiya. Yesu akulalicila pakwamba ya Ucimwene wa Mlungu, soni akupeleka umi wakwe kuti uŵe mbopesi. Kaneko Yehofa akumjimusya kuti aŵe mundu jwausimu
Yehofa akum’ŵika Mwanace jwakwe kuti aŵe Mwenye kwinani, yayikulosya kutanda kwa moŵa gambesi ga ukoto awuno wa yindu. Yesu akwalongola ŵakumkuya ŵakwe ŵapacilambo capasi pakulalicila Ucimwene wa Mlungu pacilambo cosope capasi
Yehofa akumsalila Mwanace jwakwe kuti atamilikasye Ulamusi pacilambo capasi. Ucimwenewu ukumasya maboma gosope gakusakala, ukutamilikasya Paladaiso, soni ukwakamucisya ŵandu ŵakulupicika kuti aŵe ŵangali ulemwa. Kuŵajilwa kwa Yehofa kuŵa jwakulamulila kukukwanilicikwa, soni kusakasya lina lyakwe kukumala mpaka kalakala