Madamo nga tawo ang nagapati nga ang duta kag ang tanan nga butang sa sini gintuga sa sulod lang sang anom ka adlaw nga may tig-24 ka oras, sang nagligad nga linibo ka tuig. Ini nga mga tawo ginatawag nga mga relihioso nga pundamentalista. Ginapapati ka man sang pila ka ateista nga wala sing Dios, nga ang kasaysayan sa Biblia sugidsugid lang, kag ang kabuhi natabuan lamang.

Ang pagpati sang kalabanan nga tawo yara sa tungatunga sining nagasumpakilay nga mga ideya. Ang pagbasa mo sa sini nga brosyur mahimo nagapakita nga isa ka sa ila. Mahimo nga nagapati ka sa Dios kag sa Biblia. Pero mahimo nga ginabaton mo man ang opinyon sang eksperto kag kilala nga mga sientipiko nga wala nagapati sa pagpanuga. Kon ikaw isa ka ginikanan, mahimo magpalibog ka kon ano ang isabat mo sa imo kabataan kon mamangkot sila parte sa ebolusyon kag pagpanuga.

Wala ginhimo ini nga brosyur para pakalainon ang pagpati sang mga pundamentalista ukon sang mga ateista. Sa baylo, nagalaum kami nga magapahulag ini sa imo nga usisaon liwat ang basihan sang imo pila ka ginapatihan. Ginapaathag sini ang kasaysayan sa Biblia parte sa pagpanuga nga mahimo wala mo anay nabinagbinag. Kag ginapadaku sini kon ngaa importante gid ang imo ginapatihan sa ginsuguran sang kabuhi.

Saligan mo bala ang pagpati sang mga nagasiling nga wala sing Manunuga kag indi masaligan ang Biblia? Ukon usisaon mo bala kon ano gid ang ginasiling sang Biblia? Kay sin-o mga panudlo ang dapat mo saligan kag patihan: ang mga nagapati bala sa Biblia ukon sa ebolusyon? (Hebreo 11:1) Ngaa indi mo pag-usisaon kon ano ang matuod?