តើអ្នកជឿយ៉ាងណា?
មនុស្សជាច្រើនដែលកាន់តាមគម្ពីរយ៉ាងតឹងរ៉ឹងជឿថា ព្រះបានបង្កើតផែនដីនិងអ្វីៗទាំងអស់ដែលនៅលើផែនដីក្នុងរយៈពេល៦ថ្ងៃ ដោយថ្ងៃនីមួយៗប្រើពេល២៤ម៉ោង ហើយជឿថា នេះបានកើតឡើងគ្រាន់តែប៉ុន្មានពាន់ឆ្នាំមុនប៉ុណ្ណោះ។ ចំណែកមនុស្សដែលមិនជឿថាមានព្រះវិញ ពួកគេខ្លះផ្សព្វផ្សាយគំនិតថា គ្មានអ្នកបង្កើតទេ ហើយក៏ជឿថាគម្ពីរជាសៀវភៅរឿងព្រេង ថែមទាំងផ្សាយគំនិតថា ជីវិតទាំងឡាយបានកើតមកដោយសារបាតុភូតចៃដន្យផ្សេងៗ។
គំនិតទាំងពីរនេះគឺផ្ទុយគ្នា។ តើលោកអ្នកជឿយ៉ាងណាដែរ? ជំនឿរបស់មនុស្សខ្លះ គឺរួមបញ្ចូលគំនិតទាំងពីរខាងលើនេះ។ លោកអ្នកកំពុងអានសៀវភៅនេះ ទំនងជាលោកអ្នកមានជំនឿដូច្នោះដែរ។ លោកអ្នកប្រហែលជាយល់ថាគម្ពីរមានតម្លៃ ហើយគិតថាប្រហែលជាមានព្រះមែន។ ប៉ុន្តែលោកអ្នកក៏ប្រហែលជាឲ្យតម្លៃចំពោះមតិរបស់ពួកអ្នកវិទ្យាសាស្ត្រដែរ ដោយសារពួកគេមានចំណេះដឹងខ្ពស់និងមានអានុភាព ហើយមិនជឿថាជីវិតបានត្រូវបង្កើតមកទេ។ បើលោកអ្នកមានកូន លោកអ្នកប្រហែលជាឆ្ងល់ថា ត្រូវឆ្លើយដូចម្ដេចពេលដែលកូនសួរអំពីការវិវត្តន៍និងការបង្កើត។
តើសៀវភៅនេះបានត្រូវរៀបចំឡើងក្នុងបំណងអ្វី?
សៀវភៅនេះមិនបានត្រូវរៀបចំឡើងក្នុងបំណងមើលងាយទស្សនៈរបស់អ្នកដែលកាន់តាមគម្ពីរយ៉ាងតឹងរ៉ឹង ឬមើលងាយទស្សនៈរបស់អ្នកដែលមិនជឿថាមានព្រះនោះទេ។ ផ្ទុយទៅវិញ យើងសង្ឃឹមថាសៀវភៅនេះនឹងលើកទឹកចិត្តលោកអ្នកឲ្យពិចារណាឡើងវិញនូវទីសំអាងនៃជំនឿរបស់លោកអ្នកស្តីអំពីរឿងនេះ។ សៀវភៅនេះនឹងបកស្រាយកំណត់ហេតុគម្ពីរស្តីអំពីការបង្កើតអ្វីៗទាំងអស់ ដោយលើកឡើងព័ត៌មានដែលលោកអ្នកប្រហែលជាមិនធ្លាប់ពិចារណាពីមុន។ សៀវភៅនេះក៏នឹងសង្កត់ធ្ងន់ថា ជំនឿរបស់លោកអ្នកស្តីអំពីដើមកំណើតនៃជីវិតគឺជារឿងសំខាន់ណាស់។
តើលោកអ្នកនឹងជឿទុកចិត្តទៅលើមនុស្សដែលអះអាងថា គ្មានអ្នកដែលបានបង្កើតជីវិត ហើយថាយើងមិនអាចជឿអ្វីដែលគម្ពីរចែងឬ? ឬក៏តើលោកអ្នកនឹងពិនិត្យមើលនូវអ្វីដែលគម្ពីរពិតជាចែងអំពីរឿងនោះវិញ? តើលោកអ្នកគួរជឿទុកចិត្តសេចក្ដីបង្រៀនមួយណា? តើគួរជឿគម្ពីរ ឬសេចក្ដីបង្រៀនរបស់ពួកអ្នកដែលជឿទៅលើការវិវត្តន៍? (ហេប្រឺ ១១:១) យើងសូមអញ្ជើញលោកអ្នកឲ្យពិចារណាមើលហេតុការណ៍ពិតក្នុងអត្ថបទបន្តបន្ទាប់។
