ທ່ານຄິດວ່າແນວໃດ?
ຫຼາຍຄົນທີ່ເຊື່ອໃນຄຳພີໄບເບິນຕາມຕົວອັກສອນເຊື່ອວ່າໂລກແລະສິ່ງຕ່າງໆໃນໂລກຖືກສ້າງຂຶ້ນພຽງແຕ່ບໍ່ເທົ່າໃດພັນປີຜ່ານມາພາຍໃນຫົກມື້ ເຊິ່ງແຕ່ລະມື້ມີ 24 ຊົ່ວໂມງ. ພວກນັກອະເທວະນິຍົມພະຍາຍາມເຮັດໃຫ້ທ່ານຄິດວ່າບໍ່ມີພະເຈົ້າ ຄຳພີໄບເບິນແມ່ນເລື່ອງເທບນິຍາຍ ຊີວິດທັງໝົດເກີດມາໂດຍບັງເອີນບໍ່ມີຜູ້ໃດຄວບຄຸມ.
ຄົນສ່ວນຫຼາຍຍຶດຖືແງ່ຄິດທີ່ຢູ່ຫວ່າງກາງສອງແງ່ຄິດທີ່ກົງກັນຂ້າມນີ້. ການທີ່ທ່ານອ່ານຈຸນລະສານນີ້ຈຶ່ງສະແດງວ່າທ່ານອາດຈະເປັນຄົນໜຶ່ງໃນຄົນກຸ່ມນັ້ນ. ທ່ານອາດຈະເຊື່ອວ່າມີພະເຈົ້າແລະນັບຖືຄຳພີໄບເບິນ. ແຕ່ທ່ານອາດຈະຍັງນິຍົມຄວາມຄິດເຫັນຂອງນັກວິທະຍາສາດທີ່ມີການສຶກສາສູງແລະຫຼາຍຄົນເຊື່ອຖື ເຊິ່ງເຂົາເຈົ້າບໍ່ເຊື່ອວ່າມີຜູ້ສ້າງຊີວິດ. ຖ້າທ່ານເປັນພໍ່ຫຼືແມ່ ທ່ານຄົງຈະຢາກຮູ້ວ່າຈະຕອບແນວໃດຫາກລູກຖາມເລື່ອງວິວັດທະນາການແລະການສ້າງ.
ຈຸນລະສານນີ້ມີຈຸດປະສົງແນວໃດ?
ຈຸນລະສານນີ້ບໍ່ມີຈຸດປະສົງຈະດູຖູກແນວຄິດຂອງຜູ້ທີ່ເຊື່ອຖືຄຳພີໄບເບິນຕາມຕົວອັກສອນຫຼືຜູ້ທີ່ບໍ່ເຊື່ອເລື່ອງພະເຈົ້າ. ແຕ່ເຮົາຫວັງວ່າຈຸນລະສານນີ້ຈະເຮັດໃຫ້ທ່ານກວດສອບຄວາມເຊື່ອພື້ນຖານບາງຢ່າງຂອງທ່ານອີກ. ຈຸນລະສານນີ້ຈະອະທິບາຍເລື່ອງການສ້າງໂລກທີ່ບັນທຶກໄວ້ໃນຄຳພີໄບເບິນເຊິ່ງທ່ານອາດຈະບໍ່ເຄີຍພິຈາລະນາມາກ່ອນ. ແລະຈຸນລະສານນີ້ຈະເນັ້ນໃຫ້ເຫັນວ່າເຫດຜົນທີ່ທ່ານເຊື່ອວ່າຊີວິດເກີດຂຶ້ນມາໄດ້ແນວໃດນັ້ນຈຶ່ງເປັນເລື່ອງສຳຄັນແທ້ໆ.
ທ່ານຈະເຊື່ອຄຳເວົ້າຂອງຄົນເຫຼົ່ານັ້ນທີ່ບອກວ່າບໍ່ມີຜູ້ສ້າງທີ່ມີສະຕິປັນຍາແລະຄຳພີໄບເບິນເຊື່ອບໍ່ໄດ້ບໍ? ຫຼືວ່າທ່ານຈະກວດສອບສິ່ງທີ່ຄຳພີໄບເບິນບອກໄວ້ແທ້ໆ? ຄຳສອນແນວໃດທີ່ທ່ານຄວນຈະເຊື່ອຖື ແມ່ນຄຳສອນຂອງຄຳພີໄບເບິນຫຼືວ່າແມ່ນຄຳສອນຂອງພວກນັກວິວັດທະນາການ? (ເຫບເລີ 11:1) ເປັນຫຍັງຈຶ່ງບໍ່ລອງພິຈາລະນາຂໍ້ມູນຄວາມຈິງເບິ່ງ?
