Papanisiaan na relihyoson totoo a tatawagey fundamentalist a say mundo tan amin a wadia et pinalsa ed loob na literal ya anem agew, manga pigaran libon taon labat lay apalabas. Papanisiaan balet na saray ateista ya anggapoy Dios, ya tongtong-basilyo labat so Biblia, tan nibanbana labat kunoy inlesay bilay.

Maslak ya totoo et walay panisiaan da ed sarayan nandumaan ya ideya. Nayarin sakey ka met ed sikara ta interesado kan basaen iyan brosyur. Ompan manisia ka ed Dios tan rerespetoen moy Biblia. Balet ompan panisiaan mo met iray kabkabat tan de-aral a sientista, a mangibabagan say bilay et agpinalsa. No sakey kan ateng, ompan nonodnonoten moy iyebat mo sano mantepet iray anak mo no kasin tua so ebolusyon odino kasin walay amalsa ed bilay.

Agbabalawen na sayan brosyur so pananisia na saray fundamentalist odino na saray ateista. Imbes, ginawa iya pian natulongan ka ya usisaen lamet so basiyan na sisisiaen mo. Ipaliwawa na saya so salaysay na Biblia nipaakar ed impamalsa, tan ompan agmo ni iya nausisa nensaman. Idanet met na sayan brosyur no akin a talagan importante so sisisiaen mo nipaakar ed inlesa na bilay.

Panisiaan mo ta iramay mangibabagan anggapoy intelihentin Amalsa tan say Biblia kuno et agnapanmatalkan? Odino, aralen mon mismo no anton talagay ibabaga na Biblia? Dinan so nepeg mon panmatalkan tan panisiaan: say bangat na Biblia odino saray ebolusyonista? (Hebreos 11:1) Agta maabig ya usisaen mo no anton talaga so tua?