Yini Loyikholelwako?
Bantfu labanyenti labangesuki etintfweni labebatati ngeliBhayibheli ekucaleni nobe tiliphutsa bakholelwa kutsi umhlaba nako konkhe lokukuwo kwadalwa ngemalanga lasitfupha langema-awa langu-24, eminyakeni letinkhulungwane letimbalwa letengcile. Bantfu labangakholelwa kutsi Nkulunkulu ukhona betama kufundzisa labanye kutsi akekho, kutsi liBhayibheli liyincwadzi lenetimfundziso temanga, kanye nekutsi kuphila kwavela ngengoti.
Bantfu labanyenti banemibono lesekelwe ngandlela tsite kuletimfundziso letiphikisanako. Kungenteka kutsi nawe njengobe ufundza lencwajana unemibono lecishe ifanane nalena. Kungenteka kutsi uyakholelwa kuNkulunkulu futsi uyalihlonipha liBhayibheli. Kodvwa kungenteka nekutsi uphindze uvumelane nemibono yabososayensi labafundze bagogodzela, labatsintsa kuphila kwebantfu ngetimfundziso tabo, nalabangakholelwa ekutseni kuphila kwadalwa. Nangabe ungumtali, kungenteka uyatibuta kutsi ungabaphendvula njani bantfwana bakho nabakubuta imibuto lemayelana nekutiphendvukela kwemvelo kanye nekudalwa kwetintfo.
Iyini Injongo Yalencwajana?
Injongo yalencwajana akusiko kugceka imibono yalabo labangesuki etintfweni labebatati ekucaleni nobe tiliphutsa, nobe yalabo labakhetsa kungakholelwa kuNkulunkulu. Kunaloko, siyetsemba kutsi lencwajana itakukhutsata kutsi uphindze uhlole kutsi letinye tetinkholelo takho tisekelwe kuphi. Itakuchazela ngemlandvo weliBhayibheli wekudalwa kwetintfo lokungenteka bewusengakawuhlolisisi. Itawuphindze igcizelele kutsi kungani kubalulekile kutsi yini loyikholelwako mayelana nekutsi kuphila kwaba khona njani.
Utawuyetsemba yini imibono yebantfu labatsi akekho uMdali lohlakaniphile nekutsi liBhayibheli liyincwadzi lengaketsembeki? Utakuhlola yini loko lokushiwo liBhayibheli? Ngutiphi timfundziso lokufanele utetsembe futsi utikholelwe: nguleto teliBhayibheli nobe tebantfu labakholelwa ekutiphendvukeleni kwemvelo? (Hebheru 11:1) Kungani ungahloli emaciniso ngalendzaba?
