Ema balu neʼebé hatete katak sira fiar ba buat neʼebé Bíblia fó sai kona-ba kriasaun, sira dehan katak Maromak kria rai no buat hotu iha loron neen nia laran, no loron ida-idak mak iha oras 24 deʼit, no ida-neʼe foin akontese tinan rihun balu liubá. Iha mós ema balu neʼebé hatete katak Maromak la iha no Bíblia mak livru istória nian neʼebé ema inventa deʼit, no sira mós hatete katak moris hotu mosu mesak deʼit.

Ideia rua neʼe kontra malu, maski nuneʼe ema barak gosta buat balu husi ideia rua neʼe. Oinsá ho Ita? Karik Ita fiar Maromak no hafolin Bíblia. Maibé Ita mós karik gosta ideia husi matenek-naʼin no sientista sira neʼebé la fiar katak Maromak mak kria buat hotu. Se Ita mak inan-aman, karik Ita hanoin oinsá mak Ita bele hatán kuandu Ita-nia oan husu pergunta kona-ba teoria evolusaun no kona-ba kriasaun.

Ami halo livru neʼe laʼós atu kritika no hatún ema ruma nia ideia. Maibé, ami hein katak livru neʼe sei book Ita atu hanoin fali kona-ba buat balu neʼebé Ita fiar ona. Livru neʼe sei esplika eskritura balu husi Bíblia neʼebé koʼalia kona-ba kriasaun, neʼebé karik Ita seidauk hanoin. No livru neʼe mós sei esplika kona-ba tansá mak buat neʼebé Ita fiar kona-ba moris nia hun mak importante tebes.

Ita hakarak atu tau fiar ba ema nia ideia neʼebé hatete katak la iha Kriadór no la tau fiar ba Bíblia? Ka Ita hakarak atu buka-hatene saida mak Bíblia hanorin kona-ba neʼe? Hanorin ida-neʼebé mak Ita hakarak atu tau fiar? Hanorin husi Bíblia ka husi ema neʼebé hanorin teoria evolusaun? (Ebreu 11:1) Mai ita haree hamutuk.