Ŵandu ŵane ŵa dini ŵakusakulupilila ngani ja m’Baibulo pakwamba ya kupanganya, akusaŵeceta kuti cilamboci soni yosope yayili mwelemu yapanganyidwe kwa masiku 6 gasyesyene gakola maawala 24, pa yaka yamnono yipiteyo. Ŵandu ŵane ŵakusakulupilila yakuti kwangali Mlungu, akusalingalinga kwatendekasya wawojo kuti akulupilileje yeleyo, soni kuti Baibulo jili buku ja adisi, nambosoni kuti yaumi yosope yapali kutyocela ku yindu yine.

Ŵandu ŵajinji akwete nganisyo syakulekanganalekangana pa ngani jakusisyana kuti kwana Mlungu kapena kwangali. Soni komboleka kuti wawojo akusakulupilila kuti kwana Mlungu kapena kwangali Mlungu. Komboleka kuti akusakulupilila Mlungu soni kucimbicisya Baibulo. Nambosoni akusacimbicisya yakusakulupilila ŵasayansi yakuti yaumi yosope nganiyipanganyidwa ni Mlungu. Naga wawojo ali nangolo, akusosekwa kwajanga ŵanace ŵawo naga ŵawusisye yakwayana nikuti yaumi yatesile kucenga kutyocela ku yindu yine, soni naga Mlungu ni juŵapanganyisye yosope.

Kabukuka lisosa lyakwe nganiliŵa kwacembulusya ŵandu ŵakusakanganicila misyungu ja dini jawo, kapena ŵakusasagula kulupilila kuti kwangali Mlungu. Nambo lisosa lyetu lyekulungwa lili lyakuti kabukuka kakamucisye wawojo kulolasoni yakusakulupilila. Cikakamucisyesoni kulola ngani sya m’Baibulo syele wawojo nganasiganicisyejepo. Ngani syakwe sili syakwamba yakupanganyikwa. Soni kabukuka cikagombelecesye kusosekwa kwa yindu yakusakulupilila pakwamba muwatandile umi.

Ana mpaka ŵakulupilile ŵandu ŵakusaŵeceta kuti kwangali mkupanganya jwalunda, soni ŵangakusajikulupilila Baibulo? Kapena ana caciwungunya yajikusasala Baibulo panganiji? Pasikati pa yajikusasala Baibulo ni yakusajinganya ŵasayansi, ana cikulupi cawo cigonile papi? Ana cigonile pa Baibulo kapena pa yakusakulupilila ŵandu kuti yaumi yatesile kucenga kutyocela ku yindu yine? (Ahebeli 11:1) Ana wuli ngawungunya yisyesyene yakwe?