Iti panagkunam, adda kadi panggep ti biag? Kinuna ti ebolusionista a ni William B. Provine: “Dakkel ti epekto kadatayo ti nasursurotayo maipapan iti proseso ti ebolusion. Apektaranna ti panggep ti biagtayo.” Ania ti konklusionna? “Awan ti makitak a pudpudno a panggep ti uniberso wenno ti biag dagiti tattao.”³²

Panunotem ti ipasimudaag dagita a sasao. No awan ti pudpudno a panggep ti biag, awan ngarud ti panggep ti biagmo no di laeng ti panagreggetmo nga agaramid iti sumagmamano a kinaimbag ken nalabit ipatawidmo ti dadduma a kalidad ti kinataom iti sumaganad a kaputotam. No matayka, agnanayonton nga awanka. Naiparna laeng a timmaud iti nakaparsuaan ti utekmo, agraman ti abilidadna nga agpanunot, agrason, ken mangutob iti kaipapanan ti biag.

Saan la a dayta. Ikalkalintegan ti adu a mamati iti ebolusion nga awan ti Dios wenno saan a bumallaet kadagiti aramid dagiti tattao. Aniaman ti agpayso, ti masakbayantayo ket agpannuray kadagiti lider ti politika, akademia, ken relihion. No usigentayo ti pakasaritaan dagitoy a tattao, agtultuloy latta ti riribuk, panagbibinnusor, ken panagkunniber a mangdaddadael iti kagimongan ti tao. No talaga a pudno ti ebolusion, adda ngarud umdas a rasontayo nga agbiag maitunos iti daytoy a pagsasao a mangipasimudaag iti kinaawan namnama: “Mangan ken uminumtayo, ta inton bigat mataytayo.”—1 Corinto 15:32.

Nupay kasta, maisupadi dayta iti isursuro ti Biblia: “Adda [iti Dios] ti ubbog ti biag.” (Salmo 36:9) Napateg ti ipasimudaag dagita a sasao.

No umiso ti ibagbaga ti Biblia, talaga nga adda panggep ti biag. Adda naayat a panggep ti Namarsua kadatayo agpaay iti amin a mayat nga agbiag maitunos iti pagayatanna. (Eclesiastes 12:13) Dayta a panggep ramanenna ti kari a panagbiag iti lubong nga awanan riribuk, panagbibinnusor, ken panagkunniber—ken uray ipapatay.—Salmo 37:10, 11; Isaias 25:6-8.

Mamati ti minilion a tattao iti intero a lubong a ti panagsursuro iti maipapan iti Dios ken ti panagtulnog kenkuana ket makaipaay iti makapnek a biag a saan a maipaay ti uray asinoman! (Juan 17:3) Ti kasta a pammati ket saan a naibatay iti arapaap laeng. Nalawag dagiti pammaneknek a ti biag ket naparsua.