Na o nagana gore bophelo bo na le morero? Rathutatlhagelelo William B. Provine, o re: “Seo re ithutilego sona mabapi le mogato wa tlhagelelo se na le dilo tše dikgolo tšeo di se bolelago go rena, e lego seo se kgomago taba ya go ba ga rena le morero bophelong.” Phetho ya gagwe ke efe? O re: “Ga ke bone go na le morero wa kgonthe bophelong bja batho goba legohleng.”³²

Ela hloko bohlokwa bja mantšu ao. Ge e ba go be go se na morero wa kgonthe bophelong, gona o be o ka se be le morero wa go phela ntle le gore o leke go dira botse ka tekanyo e itšego le gore mohlomongwe o fetišetše tše dingwe tša dika tša gago tša leabela molokong o latelago. Ge o ehwa, o be o tla kgaotša go ba gona sa ruri. Bjoko bja gago go akaretša le go kgona ga bjona go nagana, go nea mabaka le go naganišiša ka morero wa bophelo, bo be bo tla be bo tšweletše ka kotsi ya tlhago.

Ga go felele moo. Ba bantši bao ba dumelago thutong ya tlhagelelo ba bolela gore Modimo ga a gona goba ba re a ka se tsene ditaba tša batho gare. Maemong ao ka bobedi, bokamoso bja rena bo be bo tla ithekga ka baetapele ba tša dipolitiki, tša thuto le ba bodumedi. Ge go hlahlobja pego ya nakong e fetilego ya batho bao, gona tlhakahlakano, ntwa le kgobogo tšeo di senyago setšhaba di be di tla tšwela pele di le gona. Ruri ge e ba thuto ya tlhagelelo e be e le ya therešo, gona go be go tla bonagala go na le lebaka le le lekanego la go phela ka moano o bolayago wa gore: “A re jeng gomme re nweng, gobane gosasa re tla hwa.”—1 Bakorinthe 15:32.

Ka mo go fapanego, Beibele e ruta gore: “Go [Modimo] go na le mothopo wa bophelo.” (Psalme 36:9) Seo se bolelwago ke mantšu ao se bohlokwa.

Ge e ba seo Beibele e se bolelago e le therešo, gona bophelo bo na le morero. Mmopi wa rena o na le morero o bontšhago lerato woo a o neago bohle bao ba kgethago go phela ka go dumelelana le thato ya gagwe. (Mmoledi 12:13) Morero woo o akaretša kholofetšo ya bophelo lefaseng leo le se nago tlhakahlakano, ntwa le kgobogo—gaešita le leo le se nago lehu.—Psalme 37:10, 11; Jesaya 25:6-8.

Batho ba dimilione lefaseng ka moka ba na le lebaka le lebotse la go dumela gore go ithuta ka Modimo le go mo kwa go tla nea bophelo morero go feta kamoo selo le ge e le sefe se ka dirago ka gona! (Johane 17:3) Tumelo e bjalo ga se ya fo thewa ditorong. Bohlatse bo molaleng—dilo tše di phelago di bopilwe.