Tuir Ita-nia hanoin, tansá mak ita moris iha mundu neʼe? Sientista ida neʼebé fiar teoria evolusaun, naran William B. Provine hatete: “Buat neʼebé ita aprende ona kona-ba prosesu evolusaun kona dalan neʼebé ita halaʼo ita-nia moris.” Nia hatutan tan: “Ba haʼu, haʼu la hatene tansá mak ita ema moris iha mundu neʼe.”³²

Hanoin toʼok, se moris mak mosu mesak deʼit, ita-nia moris la iha valór ida. Se nuneʼe, karik ita-nia planu mak koko deʼit atu sai ema diʼak no hatutan tan ita-nia jene ba oan sira. Ikusmai ita sei mate, no sei lakon ba nafatin. Se ita mosu mesak deʼit, ita-nia kakutak neʼebé iha kbiit atu hanoin, hasai ideia, no hanoin kleʼan kona-ba tansá ita moris, mós mosu mesak deʼit.

Laʼós neʼe deʼit, ema barak neʼebé fiar ba evolusaun hatete katak Maromak la iha ka Maromak nunka atu envolve an iha ema nia problema sira. Se nuneʼe, ita-nia futuru depende deʼit ba polítiku-naʼin sira, matenek-naʼin sira, no ulun-naʼin relijiaun sira. Ema nia istória husi tempu uluk toʼo ohin loron hatudu katak hahalok aat hanesan funu, violénsia no korrupsaun sei la lakon. Se evolusaun mak loos duni karik, ita sei moris tuir deʼit ideia neʼebé dehan: “Ita han no hemu bá, basá aban ita sei mate.”—1 Korinto 15:32.

Maibé Bíblia hatete: “Iha [Maromak] mak moris nia hun.” (Salmo 36:9) Liafuan sira-neʼe kona dalan neʼebé ita halaʼo ita-nia moris.

Se buat neʼebé Bíblia hatete mak loos, ita iha duni razaun atu moris. Ita-nia Kriadór hakarak atu fó buat diʼak ba sira neʼebé hili atu moris tuir ninia hakarak. (Eclesiastes 12:13) Nia mós hakarak atu ema moris iha mundu neʼebé la iha funu, violénsia no korrupsaun, no mós la iha mate.—Salmo 37:10, 11; Isaías 25:6-8; Apokalipse 21:4.

Ema rihun ba rihun iha mundu tomak fiar katak aprende kona-ba Maromak no halo tuir ninia hakarak mak halo sira-nia moris iha folin duni. (Joao 17:3) Hanoin hanesan neʼe laʼós hanoin neʼebé la iha hun, maibé ida-neʼe bazeia ba prova katak moris hotu la mosu mesak deʼit, maibé Maromak mak kria.