Naa ni humbula uri vhutshilo vhu na ndivho? Muḓivhi wa pfunzo ya uri zwithu zwo sokou bvelela William B. Provine u ri: “Zwe ra zwi guda nga ha uri zwithu zwo sokou bvelela zwi ri kwama nga nḓila khulwane vhutshiloni hashu.” Musi a tshi phetha o ri: “Ndi vhona hu si na ndivho ya vhukuma kha vhutshilo ha vhathu kana fhethu hoṱhe.”³²

Ṱhogomelani ndeme ya eneo maipfi. Arali vhutshilo vhu si na ndivho, nga zwenezwo a hu na tshiitisi tsha u tshila. Zwi ḓo amba uri ri sokou tshilela u ita zwithu zwivhuya na u beba. Musi ni tshi fa, no vha ni tshi ḓo fa lwa tshoṱhe. Vhuluvhi haṋu, vhukoni ha u humbula na u elekanya nga ha ndivho ya vhutshilo zwo vha zwi tshi ḓo vha zwo sokou bvelela.

A zwi fheleli henefho fhedzi. Vhathu vhanzhi vhane vha tenda uri zwithu zwo sokou bvelela vha tenda uri a hu na Mudzimu kana uri ha na vhushaka na vhathu. Arali zwo ralo, vhutshilo hashu ho vha vhu tshi ḓo vha ho ḓitika nga vharangaphanḓa vha politiki na vha vhurereli, na vhathu vho funzeaho. U ya nga ḓivhazwakale vhenevho vhathu vha ita uri hu vhe na dzikhakhathi, u sa anḓana na u sa fulufhedzea zwine zwa ḓo bvela phanḓa. Arali pfunzo ya uri zwithu zwo sokou bvelela yo vha i ya ngoho zwo vha zwi tshi ḓo vha zwi tshi pfala u tshila u tendelana na maambele ane a ri: “Izwo-ha nga ri ḽe nga ri nwe, zwa matshelo zwo vhonwa nga nnyi!”—1 Vha-Korinta 15:32.

U fhambana na zwenezwo, Bivhili i funza uri: “[Mudzimu ndi] tshisima tsha vhutshilo.” (Psalme ya 36:9) Eneo maipfi ndi a ndeme.

Arali zwine Bivhili ya zwi amba zwi ngoho, vhutshilo vhu na ndivho. Musiki washu u na ndivho ya lufuno nga vhathu vhoṱhe vhane vha khetha u tshila u tendelana na zwine a zwi funa. (Muhuweleli 12:13) Yeneyo ndivho i katela fulufhedziso ḽa vhutshilo shangoni ḽine ḽa ḓo vha ḽi si na dzikhakhathi, u sa anḓana, na u sa fulufhedzea—naho hu lufu.—Psalme ya 37:10, 11; Yesaya 25:6-8.

Vhathu vha dzimilioni shangoni ḽoṱhe vha na tshiitisi tsha u tenda uri u guda nga ha Mudzimu na u mu thetshelesa zwi ḓo ita uri vhutshilo havho vhu vhe na ndivho! (Yohane 17:3) Lwonolwo lutendo lwo thewa kha ngoho. Vhuṱanzi vhu zwi sumbedza zwavhuḓi uri zwithu zwoṱhe zwi tshilaho zwo tou sikwa.