‘Oku taha pē ‘a e ‘Otua mo‘oní, pea ko hono huafá ko Sihova. (Saame 83:18) Ko ha Laumālie ia; ‘oku ‘ikai malava ke tau sio kiate ia. ‘Okú ne ‘ofa ‘iate kitautolu pea ‘okú ne fiema‘u ke tau ‘ofa ange foki kiate ia. ‘Okú ne toe fiema‘u foki ke tau ‘ofa ki he kakai kehé. (Mātiu 22:35-40) Ko ia ‘a e Tokotaha Aoniú, ko e Tokotaha-Fakatupu ‘o e me‘a kotoa pē.

Ko e ‘uluaki fakatupu ‘a e ‘Otuá ko ha tokotaha laumālie mālohi ‘a ia na‘e hoko ‘o ‘iloa ki mui ko Sīsū Kalaisi. Na‘e toe fakatupu foki ‘e Sihova ‘a e kau ‘āngeló.

 Na‘e fakatupu ‘e Sihova ko e ‘Otuá ‘a e ngaahi fetu‘ú pea pehē ki he māmaní mo e me‘a kotoa ‘oku ‘i aí.​—Sēnesi 1:1.

Na‘á ne ngaohi ‘a ‘Ātama, ‘a e ‘uluaki tangatá, mei he efu ‘o e kelekelé.​—Sēnesi 2:7.