SJOLOMAL 3
Chajtil ajyekʼnak skʼinal hebʼ tʼa Edén chiʼ?
Te niwan tastak wachʼ ixʼakʼji tʼa winhaj Adán yetʼ ix Eva chiʼ yuj Komam Dios (Génesis 1:28)
Ha ix bʼabʼel ix bʼobʼil yuj Jehová aton ix Eva chiʼ. Ixyakʼ ix winh tʼa winhaj Adán chiʼ yik tzʼoch ix yetbʼeyumok winh (Génesis 2:21, 22).
Ha sbʼochajnak winhaj Adán yetʼ ix Eva yuj Komam Jehová malaj jabʼok spaltaʼil hebʼ. Spensar hebʼ yetʼ sniwanil hebʼ malaj jabʼok spaltaʼil.
Edén sbʼi jun bʼaj ekʼnak hebʼ chiʼ: te wachʼtzin yilji, ay ha haʼ taʼ, pax te teʼ yetʼ nokʼ nokʼ.
Komam Jehová lolonnak (ma paxtinik) winh tʼa hebʼ. Chʼoxannak pax juntzanh tastak winh tʼa hebʼ. Yuj chiʼ tato snibʼej hebʼ tzʼajekʼ tʼa junelnhej taʼ, yowalil smaklej yabʼ hebʼ tas syal Dios.
Ajun cheknabʼil ixyakʼ Komam Dios tʼa hebʼ to max lolaj sat teʼ hebʼ (Génesis 2:16, 17)
Komam Dios ixyal winh tʼa winhaj Adán yetʼ ix Eva chiʼ: «Manh elolaj sat te teʼ chiʼ yujto tato olelo sat teʼ olexchamok».
Jun ángel ixʼoch yenemigoʼal Komam Dios; aton winh Diablo, winh Satanás.
Winh Diablo maj snibʼejlaj winh to smaklej yabʼ Komam Jehová hebʼ. Yuj chiʼ ixyakʼlabʼej jun nokʼ chan winh, ixlolonbʼat nokʼ tʼa ix Eva. Ixyal nokʼ tʼa ix tobʼ tato slo sat jun te teʼ chiʼ hebʼ, manh olchamlaj hebʼ, tobʼ lajan olaj hebʼ icha Dios. Te niwan jun es ixyal chiʼ! (Génesis 3:1-5.)
