KAPITE 3
Na Fefe’aki a Le Ma’uli i Le Palatiso?
Na soli ake e Seova kia Atama mo Eva a ne’a ma’uke e mālilie. Senesi 1:28
Na fakatupu e Seova a le uluaki fafine, ko Eva, ti na soli e ia a le fafine lenā kia Atama ke liliu ko lona āvaga.—Senesi 2:21, 22.
Na fakatupu a lāua e Seova e lā saosaoa i olā fakakaukau mo olā tino, na le’aise se mele fua e tasi ia lāua.
Ko lolā nofolaga na ko le ’ōloto o Eteni—na ko le gāne’a fulumalie ’ai mo ona liu’a, mo ona la’akau, mo ona faga manu.
Na māsau a Seova kia lāua; na ’aga a ia o ako’i lāua. Kanapauga nalā fakalogo ki le ’Atua, e lā ma’uli o le’egato i le Palatiso i le kele.
Na pati le ’Atua ke le’aise lā kai ki le la’akau e tasi. Senesi 2:16, 17
Na fakasā ake e Seova kia Atama mo Eva a le la’akau e tasi i le ’ōloto, ti mo pati ake kia lāua, kapau e lā kai kiai, ti e lā mamate loa.
Ko le tasi ’āselo na fakafesagai loa ia ki le ’Atua. Ko le ’āselo lenā ko Satana le Tiapolo.
Na le’aise loto Satana ke fakalogo a Atama mo Eva kia Seova. Na ’aga loa a ia o faka’aoga’i a le takuali ke māsau o pati kia Eva, kapau e kai a ia ki le fua o le la’akau lenā, ti e le’aise mate loa a ia, kae e liliu loa a ia o tatau mo le ’Atua. Ka ko le loi.—Senesi 3:1-5.
