VẼNH KANHRÃN 3
Mỹ ga sĩnvĩ tá hã re nĩ vã?
Jeová tóg nén ũ há e vin mũ, Adão kar Eva fi mỹ. Gênesis 1:28
Jeová vỹ ũn tỹtá ve han kỹ nĩ, Eva fi, kar ti tóg Adão mỹ fi nĩm mũ, fi tỹ tỹ Adão prũ nĩ jé. — Gênesis 2:21, 22.
Jeová vỹ fag hynhan, fag tỹ nén ũ kórég tũ nỹtĩ jé, kar fag jykre kãki.
Fag nĩnh fã sĩnvĩ ẽn jyjy vỹ tỹ ga sĩnvĩ tỹ Éden nĩ vã. Tá vỹ sĩnvĩ pẽ nĩ vã. Fag nĩnh fã vỹ goj téj nĩ vã, ka kanẽ ag, kar misu ag.
Jeová vỹ fag mré vĩ tĩ vã, kar fag kanhrãnrãn. Fag tỹ Topẽ vĩ jẽmẽ ra, fag pi hã re kã kãgter mũ vẽ, kar fag tỹ ga sĩnvĩ ẽn tá nỹtĩ hã ki mũ mũ vẽ, ga ki.
Topẽ tóg fag mỹ: “Ka ẽn kanẽ ko tũg nĩ” ke tóg. Gênesis 2:16, 17
Jeová tóg Adão kar Eva fi mỹ: ‘Ka ẽn kanẽ ko tũg nĩ; ã tỹ ti kanẽ ko kỹ, ã ter ke mũ, ha vem nĩ’, ke tóg. — Gênesis 2:17.
Vẽnh kuprĩg vỹ Topẽ kato vãsãn mũ. Vẽnh kuprĩg kórég tag vỹ tỹ Satanás nĩ, Japo ti.
Satanás pi Adão kar Eva fi tỹ Jeová tó ja ẽn han mũ ve sór mũ vẽ. Hã kỹ, ti vỹ pỹn tỹ Eva fi mỹ ke ja nĩ, fi tỹ ka ẽn kanẽ ko kỹ, fi pi ter ke mũ vẽ, hã ra fi tỹ tỹ Topẽ ri ke nĩnh mũ vẽ. Satanás tó ja ẽn vỹ tỹ vẽnh ó nĩ vã sir. — Gênesis 3:1-5.
