Muze Alama ni Eva yasema ana anji, atu yoka hashi yaputuka kulinga ungulungulu hashi heswe. Kulutwe lia matangwa, amwe angelo yalichinga ha uhulia wa Satana.

Ayo yeza hano hashi yalialumuna ngwe atu amusunya yaputuka kupomba ni mapwo. Mapwo yasema amwe yindululu ana jacho te akwa tachi jinji.

Hashi heswe te hazalile to ni ungulungulu. Mbimbiliya yinatulweze ngwo: “Ungulungulu wa atu te unji hashi heswe ni manyonga ja mu mbunge jo api wika matangwa eswe.”

Noe te mukwa ululi. Yehova yamba kuli Noe ngwenyi, munguneha sanga lia meya hanga ngunongese atu eswe waze analinga ungulungulu.

Zambi yamba nawa kuli Noe ngwenyi, tunga ulungu unene hanga unjilemo yena ni ana je ni tushitu eswe kunji ni chihwo.

Noe te kakwambujola sango ja kwiza cha Sanga lia meya, alioze ayo te keshi kumupanjika. Atu akwo te kakumuseha akwo te kakumuvwila chipululu.

Muze te kutunga cha ulungu hi chahwa Noe ni tushitu eswe kunji ni chihwo yanjila mu ulungu.