Adam na Eva ba yai bana, na bato ba timba be̱ jita o wase. Ange̱l iwo̱ i ta i lata na Satan o te̱nge̱ne̱ Loba.

I siba o wase i bo̱to̱ mańolo ma bato ná i we̱le̱ ba bito. Ba bito ba ya bana bena ba ta nde ńamb’a bato, ba ta njo na ngińa.

Na wase e timba londa na bato ba mabole̱ mambo ma bobe. Bibe̱l e makwala ná: “Bobe ba bato bo ta bo kola o wase na ná jo̱nge̱le̱ la mulema ma moto le̱se̱ di ta nde ońol’a bobe ponda ye̱se̱.”

Noa a ta nde mot’a bwam. Yehova a langwedi Noa ná a mapula bumbise̱ bato ba bobe na mpupe munde̱ne̱.

Loba a langwedi pe̱ Noa ná a longe ekokot’a medi ma munja, ma belabe̱ ná elimbi, na ná inge̱le̱ mbia mao na pat’a eyembe te̱ oten.

Noa ome̱le̱ bato jombwea mu Mpupe mu ta mwangame̱ne̱ po̱, nde ba si sengane̱ mo̱. Bō̱ ba yo̱ye̱ nde Noa; bane̱ pe̱ ba singe̱ mo̱.

Noa inge̱le̱ byembe o elimbi ponda e bo̱le̱no̱ longabe̱.