Adama ni Awa ye deenw wolo, ani mɔgɔw cayara dugukolo kan. Wagati dɔ nana se, mɛlɛkɛ dɔw murutira fana ka tugu Sutana kɔ.

U nana dugukolo kan ka adamadenw cogoya ta walisa ka musow furu. O musow ye dencɛ kabakoman dɔw wolo, minw tun ka fari ani fanga tun b’u la.

Duniɲa fara kojugukɛlaw la. Bibulu b’a fɔ ko: ‘Mɔgɔw juguyara dugukolo kan, u ka miiriya bɛɛ tun ka jugu tuma bɛɛ.’

Nuhun tun ye mɔgɔ ɲuman ye. Jehova y’a fɔ Nuhun ye ko ale bena mɔgɔ juguw halaki duniɲa bɛɛ kɔnɔ ni sanjiba dɔ ye.

Ala y’a fɔ Nuhun ye fana ko a ka kurun belebeleba dɔ dilan, ani a k’a ka denbaya ni bɛgɛn sifa bɛɛ ladon a kɔnɔ.

Nuhun ye mɔgɔw lasɔmi sanjiba nako la, nka u ma mɛnni kɛ a fɛ. Dɔw yɛlɛla a la, dɔ wɛrɛw y’a kɔniya.

Kurun dilanni kɔ, Nuhun ye bɛgɛnw ladon a kɔnɔ.