Kachonshi Adán sümüin Eva otta wainmaka maʼin wayuu saaʼu tü Mmakat. Eʼrüshii wayumüin waneeinnua aapiee maʼaka naaʼin Satanaa.

Ashakatüshii sirumatuʼujee otta wayuuyaashii süpüla naʼwayuuseinjatüin tü jieyuukalüirua. Mojulaashii maʼin na nachonniikana otta katchinshii maʼin noulia na wayuukana.

Awainmalaasü wayuu mojulaasü sainküin tü Mmakat. Saashin tü Wiwüliakat ‹mojulaashii maʼin na wayuukana› otta aainjüshii neʼe kasa mojusü waneepia.

Wayuu anamia Noé. Nüküjüin Je’waa nümüin najaʼttirajatüin wayuu mojulaasü süka wanee juya miyoʼu maʼin.

Naainjirüin nia wanee kaaja miyoʼu maʼin, müinjatü aka saaʼin wanee anua süpüla samatüinjatüin shia. Yala, nikerotirüinjatü nüpüshi otta mürüt eeka eein.

Nüküjüin Noé sümüin wayuu süʼitajatüin wanee juya miyoʼu maʼin, nnojoliika jaa namüin. Eeshii na asirajakana otta na jashichikana maʼin.

Kettaapa nutuma Noé tü anuakat, nikerotirüin na mürütkana suluʼu.