Adamu bona Heva ese natudia idia havaraia, bona tanobada ai taunimanima momo herea idia noho. Gabeai, aneru haida be Satani ena kahanai idia hanaia bona Dirava idia gwau-edeede henia.

Idia be tanobada dekenai idia mai bona tanobada tauanidia idia abia, unai amo hahine idia adavaia diba. Unai hahine ese idia havaraia natudia be taunimanima badadia momokani, mai goadadia bona idia dagedage.

Tanobada ai kara dika taudia momo herea idia noho. Baibel ia gwau: “Taunimanima . . . edia kara dika be bada herea gabu ibounai dekenai, bona edia laloa be nega ibounai ia dika sibona mo.”

Noa be tau namona. Iehova ese Noa ia hamaoroa, Ia ese abata bada herea amo kara dika taudia do ia hadikaia ore.

Danu, Dirava ese Noa ia hamaoroa lagatoi badana ta (maua latana ta bamona) do ia karaia, bona unuseniai iena famili bona animal idauidau ia hakaudia vareai.

Noa ese taunimanima ia hadibaia Abata bada herea do ia vara, to idia kamonai lasi. Haida ese Noa idia kirikirilaia; ma haida ese idia inai henia.

Noa ese lagatoi haginia gaukarana ia haorea neganai, ia ese animal be unuseniai ia hakaudia vareai.