Laj Adan ut xʼEva keʼwank ralal xkʼajol ut kiʼok chi numtaak li qas qiitzʼin saʼ xbʼeen li Ruuchichʼochʼ. Wankebʼ li anjel keʼxpaabʼ re laj Tza.

Ebʼ li anjel aʼin keʼtibʼeloʼk re naq teʼruuq chi sumlaak arin saʼ Ruuchichʼochʼ. Ebʼ li ralal xkʼajol ebʼ li ixq li keʼsumlaak rikʼinebʼ li anjel jwal kawebʼ ribʼ ut maaʼusebʼ xnaʼlebʼ.

Naabʼalebʼ li qas qiitzʼin yookebʼ chaq xbʼaanunkil li maaʼusilal. Joʼkan naq li Santil Hu naxye: «Li xmaaʼusilalebʼ li winq yo chi numtaak saʼ ruuchichʼochʼ ut junes tzʼiʼbʼeetalil naʼlebʼ nekeʼxkʼoxla».

Laj Noe chaabʼil chaq xnaʼlebʼ. Li Jehobʼa kixye re laj Noe naq rikʼin bʼutʼihaʼ tixsach li maaʼusebʼ xnaʼlebʼ.

Li Yos kixye re laj Noe naq tixyiibʼ jun li jukubʼ kabʼl re naq tixkʼe chisaʼ li xjunkabʼal ut chixjunil xpaayil li xul.

Laj Noe kixkʼe resil li bʼutʼihaʼ abʼan inkʼaʼ keʼabʼink chiru. Wankebʼ keʼseʼenk re ut wankebʼ xikʼ keʼilok re.

Naq laj Noe kiraqeʼk xyiibʼankil li jukubʼ kabʼl, kixchʼikebʼ li xul chisaʼ.