KITINI YA 5
Mvula ya Ngolo—Banani Widikilaka Nzambi? Banani Widikilaka Yandi Ve?
Bantu mingi ya ntangu ya Noa vandaka kusala mambu ya mbi. Kuyantika 6:5
Adami ti Eva butaka bana, ebuna bantu kumaka mingi na ntoto. Na nima, bawanzio ya nkaka vukanaka ti Satana na kukolama na yandi.
Bo kwisaka na ntoto mpi bo lwataka nitu ya kimuntu sambu na kukwela bankento. Bankento yina butaka bana yina lutaka bantu na nene ti na nda, bo vandaka bantu ya nku mpi ya ngolo.
Nsi-ntoto fulukaka ti bantu yina vandaka kusala mambu ya mbi. Biblia ke tuba nde: “Mambi ya muntu vandaka mingi na ntoto, mpi nde mabanza yonso ya ntima na yandi vandaka kaka mbi ntangu yonso.”
Noa widikilaka Nzambi mpi tungaka maswa. Kuyantika 6:13, 14, 18, 19, 22
Noa vandaka muntu ya mbote. Yehowa songaka Noa nde yandi ta fwa bantu ya mbi na mvula ya ngolo.
Nzambi songaka mpi Noa na kutunga bwatu mosi ya nene; bo bingaka yo maswa mpi yandi songaka yandi na kukotisa dibuta na yandi, ti bambisi ya mitindu yonso na kati na yo.
Noa kebisaka bantu nde Mvula ya Ngolo ta noka, kansi bo waka ve. Bantu mingi sekaka Noa; bankaka mengaka yandi.
Ntangu Noa manisaka kutunga maswa, yandi kotisaka bambisi na kati.
