KYENDE 5
Banazi u bungwilide Kalaga galenganizizye Mwiyalo munene?
Bantu bengi babezaga mu bindi bya Noa bakitaga mibi. Kulinga 6:5
Adamu nu Eva babutile bana, anga bantu benuba bengi mu kisi. Gatingile bindi, banzelo bamozi babingene na Satana nu kwengukana na Kalaga.
Bakumbile gano ga kisi; bibikile (aba bigyabende) mibili za balume buno basonge bakikulu. Babo bakikulu babutile bana babezaga na magala ma kutinga ma bantu. Babezaga na mitima zasunda nunse nu magala matinga musungu.
Kisi kinse kigyende na bantu bakitaga mibi tugu. Bibilia zasola buno: “Bwagi bwa bantu bwabezaga bunene nunse mu kisi, nu makengelo mabo mabezaga mabi tugu mu bindi binsania.”
Noa ungwilinde Kalaga anubaka safina. Kulinga 6:13, 14, 18, 19, 22
Noa abezaga muntu musoga. Yehowa abwinde Noa buno ekuzikya bantu babezaga bekukita mibi na mbula nkali.
Kalaga abwinde tondo Noa buno ubake bwato bunene bwamanagwa safina. Amubwinde tondo buno ingizye munda mwa bwato kikanga kyage nu lukita lunse lwinyama.
Noa akengelesizye bantu buno mbula nkali zikuvua, nu bantu tabazigile kungwa. Bamozi bamusekile nu bango bamusombile.
Gatozizye Noa safina ingizizye nyama munda mwazo.
