CHIHANDA 5
Veya Vevwililile, Kaha Veya Kavevwililileko haLivaji Lyalinene?
Vatu vavavulu mumakumbi aNowa valingilenga vyuma vyavipi. Kuputuka 6:5
Alama naEve vasemene vana, kaha vatu vavulile hano hamavu. Kutwala muze, vangelo vamwe valikangile kuli Kalunga nakukundwiza Satana.
Vejile hano hamavu, kaha vavwalile mijimba yautu nakumbata mapwevo. Ngocho, mapwevo vasemene vana vamalunga vakutaluka vaze vapwile vilyanyi.
Kano kaye kazalile navatu vaze valingilenga vyuma vyavipi. Mbimbiliya yamba ngwayo: “Kuhuka chavatu chinatoho chikuma hamavu, ngwenyi vishinganyeka vyamichima yavo vinapunga lika vyavipi lwola lwosena.”
Nowa evwililile Kalunga kaha asongele wato. Kuputuka 6:13, 14, 18, 19, 22
Nowa apwile mutu wavilinga vyamwaza. Yehova alwezele Nowa ngwenyi mwanongesa vatu vakuhuka naLivaji lyalinene.
Kalunga alwezele nawa Nowa ngwenyi atela kusonga wato waunene, nakwingisamo vaka-tanga yenyi natunyama vakulisezaseza.
Nowa ahuhumwine vatu vyaLivaji lyapwile nakwiza, oloze kavamwivwililileko. Vatu vamwe vamusehele, kaha veka vamujinjile.
Omu akumishile kusonga wato, Nowa engishile tunyama muwato.
